Shillong, Risaw 31: Ka jingïakhun semi final ba nyngkong jong ka SSA 4th Division Football League 2023 kaba la long hynne ka Sngi Hat Majai ha madan 1st Ground SSA Stadium ka la jam kaba kut ha kaba ka Kharang SC ka la khur namjop.
Ïa kane ka jingïakhun kaba la sdang ha ka por 1:45 mynsngi ka la long hapdeng ka Lamlynti FC pyrshah ïa ka Kharang SC.
Haba bishar ïa ka jingïalehkai, ka jingïakhun ka la long kaba itynnat bad kaba ïakhaid ha kaba ka kylla step ka kut khlem don nongthep. Dei hadien katto katne por ba la ïaid jong ka kylla miet, ba ka Kharang SC lyngba ka kol u Alan Marwein ha ka 77minit ka la ïoh ban lamkhmat ïa ka jingïalehkai.
Katei ka shi kol ka la ïeng skhem haduh kaba kut jong ka por kaba la pynlong ïa ka Kharang SC ban kylla long ka kynhun ba nyngkong ban jam sha ka final ha ka 4th Division mynta ka samoi.
Ka jingïakhun semi final mynta ka sngi kan sdang ha ka por 2 baje nohphaisngi ha madan 1st Ground SSA Stadium hapdeng ka Iatyllilang SC pyrshah ïa ka Mawkriah West SC.
