Jowai, Risaw 31: Ka jingïalehkai phutbol haka kyrdan Super Division Football Tournament 2023 ba la ai kyrteng ‘U Kiang Nangbah Memorial Trophy 2023’ ïa kaba la pynïaid da ka West Jaiñtia District Sports Association, (WJDSA) Jowai mynta ka sngi ha madan Kiang Nangbah Stadium, Dongmihsngi Jowai.
Ha ka jingïakhun na ka liang ka Sailung Ialong kala jop da 4-1 kol ïaka Nangbah Mulang, ïa ki kol na ka Sailung Ialong la thep da u Arwan Rymbai haka minit ba 16, u Bachan Pale haka minit ba 50 & 69 bad u Casper Lhuid haka minit ba 90+4. Katba na ka liang ka Nangbah Mulang la thep da u Albert Lyngdoh haka minit ba 77.
La pyntip ba ka jingïakhun lashai ka sngi 01.11.2023 kan long hapdeng ka Mynthong pyrshah ïa ka Ladthadlaboh haka por 2 baje nohphai sngi.
Ha ka 1st Divsion : Ka lympung ïalehkai phutbol kaba la tip kum ka “Chatister Kharkongor Memorial Trophy 1st Division Football Tournament – 2023 bala pynïaid da ka West Jaiñtia District Sports Association, (WJDSA) Jowai kaba la long mynta ka sngi ha madan Kiang Nangbah Stadium, Dongmihsngi Jowai.
Haba phai sha ka jingïakhun na ka liang ka kynhun ïalehkai jong ka Sabahmuswang kala lah ban pynliem haduh 6-1 kol ïa ka Moosyiem Shangpung, ïa kitei ki kol na ka Sabahmuswang la thep da u Needful Shylla haka minit ba 74, u Wanmiki Lyngdoh ar kol haka minit ba 79 & 81 bad u Chare Mulieh lai kol haka minit ba 85, 89 & 90+2. Katba ïa ka shikol na ka Moosyiem Shangpung la thep da u Shickel Langbang.
Ka jingïakhun lashai ka sngi 01.11.2023 kan long hapdeng ka Mookyndur pyrshah ïa ka Demthring haka por 12 baje shiteng sngi.
