Paris, Risaw 31 : U khlur thep kol ka Argentina bad ruh jong ka Inter Miami u Lionell Messi u la ïoh ban khur ïa ka khusnam rangïalehkai ba kynsai ha ka pyrthei ne ka Ballon d’Or ha ka sien kaba phra.
Katei ka nam ba utei u rangïalehkai u ïoh kadei ruh hadien ba u la lah ban ïalam ïa ka Ri ban khur ïa ka nam lahduh ha ka World Cup kaba long ha Qatar ha u snem ba la dep. U Messi u la ïoh ïa katei ka nam da kaba tam ïa u rangïalehkai ba paw bha ka Manchester City u Erling Haaland.
Ha kajuh ka por u rangïalehkai pdeng madan jong ka England bad Real Madrid u Jude Bellingham u la ïoh ban khur ïa ka khusnam Kopa Trophy ne ka nam rangïalehkai ba kynsai ha ka thup kiba hapoh 21 snem.
U rangïalehkai khmat ka France u Kylian Mbappe uba kylla long u rangïalehkai ba ar ban thep hat-trick ha ka final World Cup u la wan ha ka kyrdan ba lai.
“Nga dap da ka jingkmen kaba khraw ban ïoh ïeng biang sa shisien hangne,” ong u Messi da kaba bynrap ba ka long ka burom kaba khraw ban ïoh rah ïa ka nam lahduh ha ka World Cup bad pynurlong ïa ka jingphohsniew.
Une u rangïalehkai shakhmat barim ka Barcelona bad Paris St-Germain u la ong ruh, “Ngam lah ban mutdur ba nalor kiei kiei kiba nga la ïoh ha ka lynti ïaid ha ka jingim kum u nongïalehkai nga ïoh ruh ïa ka lad ban don bynta bad ka kynhun kaba paka tam eh.
Nalorkata u ong ruh ba baroh na kitei ki khusnam Ballon d’Or kidei kiba kyrpang bad kynsai ha ki rukom rukom.
Ha kajuh ka por ka thei ïalehkai pdeng ka Spain bad Barcelona ka Aitana Bonmati ka la khur ïa ka Ballon d’Or ha ka liang ki kynthei ha ka sien kaba nyngkong eh.
Katei ka thei ïalehkai ba dang 25 snem ka la ïoh ban don bynta bun bha bad ka kynhun bad ïarap ruh ïa ka klob ban khur ïa ka nam ba nyngkong ha ka Spanish bad Champions Legaue nalor ba ka ïarap ïa ka Ri ban khur ïa ka nam lahduh ha ka World Cup ba dang shu lah shen. Nalorkata ka la shah jied ruh ban khur ïa ka khusnam ‘Uefa player of the year’ ha u Nailar.
