Nongstoiñ, Nailur 6: Ka Emans Charitable Trust kaba dei ka kynhun napoh Nongstoiñ, hapoh ka jingkhmih jingpeit jong u MLA Bah Gabriel Wahlang, ha ka sngi thohdieng ka la pynlong ïa ka jingpynkup burom sha ki 32 ngut ki samla ka Nongstoiñ Constituency, kiba la pass bad paw bha ha ki exam bapher bapher.
Ïa kane ka prokram la pynlong ha Bishop Hall New Nongstoiñ, ha kaba la donlang ruh u Bah Gabriel Wahlang kum u kongsan, u Deputy Commissioner Bah Garod LSN Dykes, u Superintendent of Police u Bikram Marak, u Babu E.Marngar na ka liang ka SDSEO, ki nonghikai, ki kmie ki kpa lem bad ki nonghikai nalor ki nongïoh khusnam.
Haba kren ha ka jingïalang na ka liang ki nongkren ki la kyntu sha baroh ki samla pule ba kin trei shitom, khamtam eh ha kiba kum kine ki sngi ba ka jingïakop ka jur bha bad lada shu pass malu mala ym lah ban kot sha ka thong bad ki jingpule ka shu kut noh tang shiteng por. Ki la kyntu ruh ba dei ban don ïa ka thong ha ka jingim khnang ba ki lah pat ban ïakhun lane ïa kop bad kiwei pat.
U MLA u la ban jur halor ka jingaiti lut ha ka jingpule bad ong ruh ba mynta ba kiba bun hi ki kham pynlut por ha ka mobile, kaba long tang ka jingwit bad ka jingdkoh ha ka pule puthi, kaba wanrah pynban ïa ka jingjot ïa ka lawei ka jong ki. Kaei kaba donkam ka long ban duriap bha bad pynshitom khnang ban lah ïakop bad kiwei pat ki jaidbynriew.
U MLA ha ka sngi thohdieng u la sam ym tang ki memento, hynrei ka khusnam pisa kab shi phew hajar bad ar phew hajar katkum ki kyrdan pule. U la pynbna ruh ba ha u snem ban wan ka song jingïarap da ka pisa kan long 40 hajar sha kito kiba paw ha ka exam MCS.
Kumjuh ruh shi lak tyngka na ka bynta kito kiba paw ha ka exam IAS. U la kren shai ruh ba kane ka song jingïarap ka dei kaba u ai hi na ka liang jong u kum u MLA, ha kaba ka thong hi ka long ban ai mynsiem bad kyntiew ïa ka pule puthi ha ka Constituency baroh kawei.
“Phi dei ban don ka thong ha ka jingim, namar khlem ka thong phim lah ban poi shano shano ruh bad ka jingtrei shitom ki kmie ki kpa lane ki nonghikai kam poi shano shano lada phim shim ïa ka jingkitkhlieh halor lade. Wat buh ïa ka jingduk, hynrei buh ïa ka kot pule bad u Blei hakhmat, kata ka dei kaba kongsan”, ong u MLA.
Ha kane ka sngi la pynphuh pynphieng ïa ka jingïalang pynkup burom sha ki 32 ngut ki samla pule, da ki jingrwai na ka Nongstoiñ Public School bad ruh ki jingshad na ki samla pule ka sor Nongstoiñ.
