Shillong, Risaw 15 : Ka Karbi Students Union (KSU) kala aipor laibnai ïa ka Sorkar Assam ba kan pynbeit noh ïa ka jingïakajia pud bad ka Jylla Meghalaya lane ai noh da la ka jong ka Jylla sha ka Karbi Anglong.
Ka jingdawa kala mih tang da ki sngi hadien ka jingjia ïa umsnam hapdeng ki Karbi bad ki Pnar ha ka shnong Lapangap, West Jaintia Hills, kaba lam sha ka jingiap uwei u nong Karbi Oriwel Timung.
“Kane ka jingjia ka pyni ïa ka jingbym lah jong ka Sorkar Assam ban pynthikna ïa ka jinglong trai i’u pud u sam jong ka West Karbi Anglong bad ruh ka pyni ruh ba ka Sorkar Assam kam shimkhia satia ban pynskhem ïa u pud u sam khamtam jong ka Karbi Anglong bad West Karbi Anglong District” ong u President ka KSU Tokbi Sarim Tokbi ha ka kyrwoh ba pynmih ha ka sngi Balang.
Ula ong ba wat hapdeng ka MoU bala ïasoi hapdeng ka Sorkar Assam bad Meghalaya ha u snem 2022, kum kine ki jingjia kila nang jia na ka por sha ka por ha Tapat bad ka thaiñ Dhansiri.
“Ngi buh ïa ka jingaipor jong ngi hakhmat ka Sorkar lyngba kane ka lad phah khubor ba kan pynbeit noh ïa u pud u sam hapoh 3 bnai lane ai noh sha ngi ïa la ka jong ka Jylla khnang ba ki paidbah ka Karbi Anglong bad West Karbi Anglong kin lah ban shim hi hala ka jong ka kti ban ïada ïa u pud u sam namar ka Sorkar Assam kam don jingsngewkhia bad ym ñiew kor ïa ka jingim bad ka khyndew ka shyiap jong ki Karbi bad kiwei ki trai muluk ba sah ha kine ki artylli ki District ka KAAC” bynrap u Tokbi.
Ka KSU kala buh ruh ïa ki kyndon hakhmat ka Sorkar Assam ba kan leh eiei ha kaban ïada ïa ka bha ka miat ki Karbi bad kiwei ki trai muluk ka thaiñ KAAC da kaba aiti noh ïa ka kam shongsuk shongsaiñ (Border Management) sha ka Karbi Anglong ba kan pynïaid hi ïala u pud u sam bad pynkhem ïa ka jinglong trai jaka.
Kala dawa ruh ïa ka Sorkar Assam ban shah ïa ki paidbah basah ha khappud ka West Karbi Anglong bad ka Meghalaya bad kumjuh ruh ka Karbi Anglong bad ka Nagaland ba kin buh suloi hapoh ka Arm Licence Rule ba kin ïada ïalade na ki kam thombor ha khappud.
“Lada ka Sorkar kam lah ban pyntreikam ïa kine ki kyndon bala buh, ka Assam kam don hok ban ïai bteng ha kaban synshar ïa ka KAAC bad ka dei ban ai noh ïala ka jong ka Jylla kat kum ka Article 3 jong ka Riti Synshar ka Ri” ula ong.
