Shillong, Risaw 15: Saw ngut ki nong Meghalaya napdeng ki 16 ngut ki briew, kila shah kem ha ki Pulit ka Bengaluru halor ka jingkynnoh ba ki pynïaid ïa ka Business Process Outsourcing (BPO) thok, kaba shukor pisa ïa ki nongshongshnong ka United States of America bad ka Canada lyngba ki kor Online.
Kat kum ka jingïathuh ki Pulit, kine ki briew ki dei shibynta jong ka kompani thok ba kyrteng ka Cybits Solution Pvt Ltd, kaba don ïa ka Ophis Treikam ha HSR Layout, Bengaluru, kaba kam thok ïalade ba ka ai jingshakri BPO.
La kynnoh ba kane ka kompani kala thung haduh 20-25 ngut ki nongtrei lyngba ka rynsan online bad hadien ka jingai jinghikai pyntbit, kala bthah ïa ki, ba kin phone bad thok ïa ki briew kiba dei na kiwei pat ki Ri.
Ki saw ngut kiba shah kem na Meghalaya ki dei kiba la tip kyrteng kum u F.Minot Kankai (32), R. Remison Bamon (30), K Phani Leybha Nangzi (27) bad F Eljiba Mary Marbaniang (23). Kiwei pat ki dei na Maharashtra, Odisha, Madhyra Pradesh,West Bengal bad Gujarat.
U Police Commissioner ka Bengaluru u Seemant Kumar Singh ula ong ba kine ki briew kila kam ïalade kum ki Heh ka Tnad Aiñ ka United States bad byrngem ïa ki lanot da ki jingkynnoh ba khaïi droks bad ka jingkamai pisa beaiñ. Hadien, ki sa dawa pisa ha ka nam ban pynkut noh ïa ka case.
“Kine kiba shah kynnoh kila shukor ïa ki briew lyngba ka internet call. Ngi la ïoh kurup haduh 41 tylli ki Computer, 25 tylli ki mobile phone, ID card, router, modems, bad kiwei ki mar na ka ophis kane ka kompani” ong u Commissioneer.
Ki Pulit ki ïathuh ba kane ka kompani kala thungkam ïa ki briew da kaba shu leh online bad pynbiej ïa ki da ki jingkular ban pynbiang jaka sah, pynbiang ïa ki kali ban leit ban wan bad ka bam ba ïoh ei. Kiba bun ki ngeit bad kila wan ban trei bad kane ka kompani thok.
Ki Pulit kila register da ka suo motu case ha HSR Layout Police Station bad ka jingtohkit mynta ka dang ïaid shaid shaid ban lap ïa ki briew ba donkti ha lyndet kane ka kompani bad ban ïoh jingkheiñ ruh ïa ka pisa ba kila thok na ki briew ba shabar ka Ri.
