26 ngut ki kyrtong na JHADC bad 25 na KHADC, sah sa ka thup ba khatduh

Ba phet noh u Bah Teibor kynduh kyrkieh ki heh NPP

0

Shillong, K’Lyngkot 12 : Ka National People’s Party (NPP) hadien ba ka la dep ban pyllait ïa ki 26 ngut ki kyrtong ban aireng na Jaiñtia Hills Autonomous District Council (JHADC) bad 25 ngut pat na Khasi Hills Autonomous District Council (KHADC), mynta ka pynkhreh ban pyllait sa ïa ka thup kyrteng kaba khatduh na bynta kane ka elekshon MDC kaba la buh ban long ha ka 21tarik u Rymphang mynta u snem.
“Ha kane ka taiew ngi khmih lynti ba ngin pyllait biang ïa ka thup kyrteng jong ki kyrtong na ka bynta ka JHADC,” ong u Working President, Bah Hamlet Dohling.
Haba ïadei pat bad ki kyrtong jong ka KHADC, u Bah Hamlet u la pyntip ba ïa mynta hi na ka party ki dang thaw lad ban ïoh sei shuh sa katto katne ngut ki kyrtong.
Na ka daw ka jingphet noh u MDC ka Mawlai Bah Teibor Pathaw na ka NPP ban iakhun kum u kyrtong shimet, na ka liang ki nongïalam ka NPP hynin ka miet ki la kynduh kyrkieh bad lum ïa ki nongialam jong ka NPP Mawlai kiba dang sah.
“Ha ka jingïalang ngi la rai bad bthah ïaki nongïalam jong ka party kiba dang sah ba kin pynkhlaiñ biang ïa ka party ha Mawlai bad hadien kane ngin sa shim pat kumno ban pyntyllun ia ka kam shakhmat,” u la ong.
Kumban shu pynkynmaw ka jingmih noh jong u Bah Teibor na ka NPP kadei hadien ba ki paidbah ha ka jingialang kaba long dang shen ha Mawlai Nonglum da kawei ka sur ki la pynpaw ba lada u iakhun kum u kyrtong shimet ka jingkyrmen ka don ba un jop biang ha kane ka elekshon MDC.

Leave A Reply

Your email address will not be published.