Shillong, Nailar, 06: Ka Ramakrishna Mission Vivekananda Cultural Centre, Quinton Road, Shillong ha ka Sngi Saitjaiñ ka la sam ïa ki khusnam jong ka 49th Annual Cultural Competition sha ki 246 ngut ki nongjop ba la ïashim bynta da ki khynnah na ki shlem pule bapher bapher ka nongbah Shillong bad na ki jaka ba marjan.
Kine ki 246 ngut ki nongjop ha ki jingïakop bapher bapher ki long naduh ka klas Nursery had ki khynnah kolej ki la ïoh ïa ki khusnam, syrnot bad ki jingïaroh.
Ka Deputy Commissioner jong ka East Khasi Hills ka Kong Rosetta Mary Kurbah kaba la long kum ka Kongsan ka la kitbok kitrwiang bad ai ruh ka jingïaroh ïa ki nongjop. Ka la ïaroh ruh ïa ki sienjam jong ka Ramakrishna Mission kaba la pynlong ïa kane ka jingïakop bad ka la kyntu ïa ki kmie ki kpa ba Plie u MLA ïa ka ophis ba la shna pynbha ha Dr. H. Gordon Roberts Hospitalkin phikir ïa ka koit ka khiah jong ki khun jong ki, khamtam kito kiba dang hapoh 5 snem ka rta.
Ka Principal jong ka Shillong Commerce College ka Dr. Sabita Sen kaba ka long kum ka symbud kongsan ka la ai mynsiem ïa ki nongjop, khamtam kito kiba na ki Secondary School ba kin pyntbit shuh shuh ïalade. Ka la ai jingsngewnguh ïa ka Ramakrishna Mission na ka bynta ki jingai jingshakri ïa ka imlang sahlang.
Ha kane ka sngi la plie paidbah ïa artylli ki Website bathymmai bad lyngba kine ki website yn ai jingtip shaphang ki kam ka Mission bad ki kam jong ka Vivekananda cultural centre.
Hashuwa kane, u Swami Divyaswarupananda Maharaj, Assistant Secretary ka Ramakrishna Mission, Shillong u la pdiang burom ïa baroh kiba la wan ïashim bynta ha kane ka sngi bad u Vairagya Chaitanya Maharaj u la ai ka jingsngewnguh.
Ka 49th Annual Cultural Competition ka dei ka jingrakhe ïa ka jingtbit, ka jingsaindur bad ka jingïatylli. Ka Ramakrishna Mission, Shillong, sa shisien ka la pyni ïa ka jingkut jingmut jong ka ban ai rynsan ïa ki briew ba don sap bad ruh ban pynneh ïa ka deiriti jong kane ka thain. Kane ka prokram ka la ai mynsiem ïa kito kiba la wan ïashim bynta ba kin kham pyntbit shuh shuh ïalade bad ba kin don bynta ha ka jingkyntiew ïa ka deiriti ha Shillong bad ha ki jaka ba marjan.
