Shillong, Nailar, 06: U MLA jong ka North Shillong Constitunecy u Bah Adelbert Nongrum ha ka sngi Thohdieng u la plie paidbah ïa ka ophis jong ka Dr. H. Gordon Roberts Hospital kaba la khot ka Hospital Governing Board ophis ba la shna pynbha lyngba ka MLA skhim ha ka jinglut kaba la kot T. 4. 60 lak.
Shwa ban plie ïa kane ka ophis, u MLA u la ai ka jingïaroh ïa ka jingshakri jong ka hospital lyngba ka jingaiti kiba don hapoh ka Governing Board.
“Kaei kaba donkam mynta ka dei ka rukom treikam kaba shit bashai bad ba khuid jong ki kam shakri. Nga la ïohi ka jingtreishitom jong kiba trei hapoh ka hospital ha ka por ba la wan lynshop ka jingpang khlam COVID-19. Nga sngewkmen ban ïoh noh synniang namar ka jingdonkam jong kane ka jaka sumar ha kine ki snem, kumta ka ai mynsiem ba ngi dei ban leh ïa kaba dei bad kaba bha,” ong u Bah Nongrum.
U la ong ruh ba ki bun ki ïakren tang ki kam pynroi kiba kylla long ki Envelopment ne Devilopment, hynrei ha kane ka Constituency kam long kumta namar ka dei ka Constituecny kaba la bun ki riewshemphang.
U Senior Administrative Secretary jong ka KJP Assembly u Rev. S.R. Dkhar u la ong ba ka jingdon jong kane ka ophis ka long kaba donkam ban kyntiew ïa baroh ki kam jong ka hospital bad kan ym lah ban long ba katne ka hospital kan ym don la ka jong ka ophis.
“Ngi khmih lynti lyngba kane ka ophis kan don ka jingïamir jingmut ban rah shajrong ïa ka Hospital bad nga ai khublei ïa u MLA u bym shym iehnoh ïa ki jingdonkam kane ka jaka sumar lyngba ki jingshakri bad kam bakhraw,” bynrap u Rev. Dkhar.
U Administrative Officer jong ka Hospital u Bah K W Marbaniang u la ong ka long kaba donkam ïa ka ophis ka Governing Board jong ka Hospital ïa kaba la sdang naduh u snem 2017. La ong ba ka dei ban don ka ophis kaba thikna ryngkatlang bad ka Address.
“Halor kane ka jingdonkam ban don la ka ophis ngi la pyntip sha u MLA ban pynthymmai ïa ka ophis,” u la ong.
Ha kaba sdang, la shem ba ka jinglut ka long T. 3. 36 lak tam bad hadien ba la mang biang ha ka jinglut kaba T. 4 lak tam bad ka jingïoh ïa kane ka skhim ka la long haduh ki lai wat kat haduh ba la lah ban plie mynta ka sngi bad ym lah ban klet ïa ki jingïarap ba manla ka por jong u MLA kum ha ki por COVID ha kaba ki tiar ki la poi la palat T. 3 lak, ïathuh u Bah Marbaniang.
Kiwei kiba la sakhi lang ha kane ka sngi ki long u Chairman Hospital Governing Board u Rev. S.S. Majaw, u Hospital Chaplain u Rev. George W. Chen, u Medical Superintendent u Dr. R Nongrum bad kiwei kiwei.
