Imphal, Nailar 6 : Ki Pulit ka Manipur ki la ïoh ban kurup haduh 1195 tylli ki suloi bad 14332 tylli ki kuli ha ka jingkhynra ba la pynlong ha ki jaka ba jur bha ka jingïaum snam hapoh ki District bapher bapher ka Manipur.
“Ngi la ioh kurup biang haduh 1057 tylli ki tiar siat bad 14201 tylli ki kuli na ki Valley District bad 138 tylli ki suloi bad 121 tylli ki kuli na ki hill District bad kine ki dei kito ki suloi ba la shah knieh na ki Police Station bad Out Post bapher bapher” ong ki Heh Pulit.
Ha ka 5 tarik Nailar, ka la don ka jingthombor bad rong tuh ïa ki tiar siat na ka kynhun ki Pulit ha Toupokpi Police Outpost bad ha Lilong Chajing, Imphal West.
Shuwa kane, palat 4000 tylli ki tiar siat bad ki kuli ki la shah tuh na ki jaka buh tiar siat jong ki bor pahara ba la phah sha Manipur, kaba la jia ruh ha ka por ba dang thnem bha ka thma ïapher jaidbynriew hapdeng ki Kuki bad ki Meitei.
Ki bor pahara ki la pynjur bha ïa ka jingkhynra ha ki District bapher bapher bad ki la ïoh ban kurup ïa bun bah ki tiar kiba shah tuh na ki jaka buh tiar ki bor pahara bad Pulit.
