24 kynta aipor ka KSU ïa ka sorkar ban pynbeit bad pynshai halor thup pule Doktor 2023

Shillong, Nailur 03 : Ka Khasi Student’s Union ka la pynpaw ka jingkyndit bad ong ruh ba kam lah ban pdiang ïa ka thup pule doctor (MBBS 2023) ba la pynmih da ka sorkar dang shen.
Ha ka jingïakren bad u President bad Genral Secretary ka KS U u Samla Lambokstarwell Marngar bad Samla Donald Thabah ki la ïathuh ba ka seng ka ai por ïa ka sorkar 24 kynta ban pynbeit ïa ka list khamtam ïa ka Open Category lym kumta ka seng kam banse ban ïaid da kiwei ki lynti.
Ka seng ha ka kyrwoh sha ki lad pathai khubor lyngba u General Secretary, ka la pynkynmaw ba dang ha ka 23tarik u Nailar ka la pyntip paidbah halor ka jingïoh rung ki bar jylla ha ka Screeening list jong ka bhah pule MBBS hadien ba ka la ïoh jingtip ba ki don bun ngut ki bar jylla kiba ïoh rung ha ka thup Open Category watla kim biang ki kot ki sla ban pynshisha ba ki dei ki nongshong shnong ka Meghalaya.
“Hadien kane ka sorkar jylla lyngba ka tnad ba dei peit ïa ka Koit ka Khiah, ka la kular lyngba ki lad pathai khubor ba kan sa bishar bniah ban pynshisha la kita ki samla pule ki dei shisha ne em ki nong Meghalaya. Kyndit kynsan pat ha ka 01 tarik u Nailur 2023, la pynmih ïa ka thup jong ki samla pule ban ïoh leit pule MBBS lyngba ka bhah sorkar bad la shem ba kitei ki juh ki bym dei Khasi kiba don ha ka Screening List ki la shah jied ban leit pule lyngba ka bhah Open Category. Kane ka la pynshaiong ngain ïa ki paidbah bad bun ngut ki la ujor sha ka KSU. Hadien kane ka KSU ka la wad jingtip bniah halor ki kot ki sla jong kitei ki bar jylla bad ka la ïoh ruh ki kot ki sla lyngba ki nongujor RTI halor katei ka phang. Ka KSU lyngba kitei ki jingtip ka pynbna ba katei ka rukom jied samla pule jong ka sorkar jylla ka long kaba bakla shibun, kaba iuhroit ïa ka hok jong ki samla pule kiba dei ki trai jylla ym tang ki Khasi hynrei wat ïa ki bym dei khasi kiba sah ha jylla bad kaba shu leh buit tuh bad leh donbor da mano re mano,” ong ka kyrwoh ba la phah da u General Secretary ka Seng, Samla Donald V Thabah
Shuh shuh la kam ruh ba ka seng ka lap shibun ki jingduna ha kaba ïa dei bad ka thup Open Category. “La shem ba ki kot ki sla jong ki 9 ngut ki bar jylla kiba shah jied ki long ki ba duna haduh katta katta bad kiba i shan khmat ha kaba ïa dei bad ka jingshisha,” bynrap biang ka kyrwoh.
La kdew ruh ba katkum kawei na ki kyndon ka sorkar jylla, ki samla pule ki dei ban don ki Permanent Resident Certificate (PRC) na ka jylla, hynrei na ka seng ka lap ba bun ngut kitei ki bar jylla kim shym la don ka PRC kaba pura, hynrei ki thep pynban da ki Provisional Permanent Resident Certificate (PPRC) kiba treikam tang 3 lane 12 bnai.
“Kaba mut ba lada kut kita ki 3 bnai lane 12 bnai kitei ki briew kim dei shuh ki nongshong shnong ka Meghalaya. Shuh shuh la shem ruh ba bun bha na kitei ki PPRC ki la kut ka por). Ka jingkylli ka long ba kumno ka tnad Health ka pdiang ïa kum kitei ki kot ki sla ki bym shong khia? Ki kot ki sla ki bym don hok ban pdiang kum kita ki syrnod ba shisha ban kam ba ki dei ki nong Meghalaya,” la bynrap biang ka kyrwoh.
Ka Seng ka kam ruh ba ki don ruh katto katne napdeng kitei ki 9 ngut kiba khlem phah lang ruh ïa la ka Birth Certificate. Kiba thep pat ïa ki Birth Certificate la shem ba ki dei ki Certificate kiba dang shu ïoh shen na ka jylla khamtam na ka thain Garo Hills. “Katkum ka rukom kino kino kiba aplai ïa ka Birth Certificate hadien shi bnai shaneng ba kha ïa ki, ki hap ai bad ka Court Order. Kane ka kyndon ka treikam ïa baroh kynthup ïa ki Khasi. Hynrei jan baroh kitei ki bar jylla ki thep ïa ki Birth Certificate ki bym don wat tang ka court order kaba buh ïa ka jingkylli kumno la ai ïa ki Birth Certificates khlem ki Court Order,” buh jingkylli biang ka seng.
“Ka birth certificate jong uwei u samla pule la ïoh ha u snem 2012 ban pyni ba udei u nong Meghalaya. Kane ka certificate ruh kam don court order. Hynrei kaba kham i kynsha ka long ba ha kata ka syrnod la kha ïa u ha u snem 2003 hynrei ka tarik registration pat ka dei ha u snem 2002. Hato lah seh ban shna certificate lypa 1 snem shwa ban kha ïa u briew kumba la ïathuh lypa ba ïa une u briew yn sa kha ha u snem ban wan,” ong ka kyrwoh. Nalorkata la ong ruh ba utei u samla pule u la thep da ki kot ki sla ba na Bihar bad Rajasthan kynthup ïa ka Birth Certificate hynrei une u samla u ïoh ïa ka PPRC na ka shnong Thangskai, East Jaintia Hills kaba pynlyngngoh ha kano ka nongrim ba la ai PPRC na Thangskai.
“Haba la bishar bniah pat ïa 3 ngut ki bar jylla kiba don ha thup Waiting List jong ka Open Category la shem ba uwei na kine ruh um biang ki kot ki sla ban pynshisha ba u dei u nong Meghalaya. Tang na kitei ki jingshem haneng la paw shai ba wat ki bar jylla kiba dei na Meghalaya ruh ki la duh noh ïa ka kabu ban pule MBBS lyngba ka bhah sorkar nalor ki Khasi,” ong ka kyrwoh.
Shuh shuh la ong ruh ba ar ngut ki Khasi kiba ïoh ba nyngkong bad ba ar ha ka Khasi-Jaintia Category ki dei ban ïoh rung ha ka thup Open Category ha ka kyrdan ba 6 bad ba 7 hynrei ki la shah kynthup pynban ha ka thup Khasi-Jaintia Category. Kumta halor kane, na ka liang ka seng ka la ong ba katei ka jingleh jong ka sorkar ka pynduh noh ïa ka hok jong ar ngut pat ki Khasi kiba don ha ka Waiting List jong ka Khasi-Jaintia Category. “Ka Open Category kam dei ka General Category ha kaba yn ïoh tang ki Non-Tribal, hynrei ka ktien Open hi ka la batai shai ba baroh lada dei ki Tribal ne Non-Tribal ki lah ban ïoh rung ha kane ka thup katkum ka Merit.”
Ka seng ka pynkynmaw ruh da kaba ong ba ha u snem 2020 ka la don ka jingleh buit-tuh ka tnad Agriculture ban thep ïa ki Khasi ha ka thup Khasi-Jaintia Category haba ki mark ki jong ki, ki ïa hap ban rung ha ka Open Category ban leit pule B.Sc. Agri.
“Ka KSU ha une u snem ka la leit ban pynsngew ïa u Bah Banteidor Lyngdoh uba dei u Agriculture Minister ha kato ka por bad u Bah Banteidor u la bthah mar mar ïa ki ophisar ki jong u ban pynbeit ïa kine ki jingbakla bad la thep ïa kita ki samla pule Khasi ha ka Open Category. Mynshem snem ka bhah pule MBBS jong ka Meghalaya ka dei 87, hynrei ka Health Minister ka ong ba ka jylla ka la ïoh bhah shuh shuh sa 10 tylli kaba pynkiew na ka 87 sha ka 97. Lada bishar pat ïa ka ka MBBS quota list kaba mynta don tang 92 ngut ki samla ba shah jied. Shaei jah sa 5 tylli ki seats?” buh jingkylli ka Seng.
Kumta, na ka liang ka seng ka ong ba kine ki kynrum kynram baroh ba la lap da ka seng la shem ba ki long ki jingleh donbor bad thombor ïa ki trai jylla naduh ki Khasi, ki Garo bad ki Non-tribal kaba pynduh ïa ka hok ka jong ki ban leit pule MBBS lyngba ka bhah sorkar.
“Ka pyni ruh ïa ka jingthurmur ka sorkar bad ki ophisar jong ka kaba ktah ban pynjot ïa ka lawei ki trai jylla. Ka KSU ka maham tyngeh ba ka sorkar ka dei ban pynbeit mardor ïa kine ki kynrum kynram lym kumta ka KSU kan hap ban shim da ki sienjam kiba tyngeh ban dawa ïa ka hok jong ki samla pule Khasi,” la ong ka kyrwoh ba la phah da u General Secretary jong ka, samla Donald V Thabah.
Ka seng ka pynkynmaw ruh da kaba ong ba ha u 2009, ka la wad lyngba ka RTI katno ngut ki bym dei Khasi kiba leit pule MBBS na ka bhah Meghalaya naduh u snem 1991 haduh 2009 ki la wan phai ban shakri ïa ka jylla. Hynrei ka jubab kaba ki ïohi katkum ka RTI ka long ba napdeng ki spah ngut tang lai ngut kiba trei ha Meghalaya.