Shillong, Lber, 16: U Chief Electoral Officer jong ka Jylla u DR. BDR Tiwari ha ka 16 tarik u Lber, 2024 u la pyntip ba ki nongthep vote ha Meghalaya haduh une u snem 2024 ki don 22, 17,100 lak ngut ban rai ïa ka lawei san snem jong ki kyrtong na Shillong bad na Tura ha ka eleshon Lok Sabha ka ban sa long ha ka 19 tarik Ïaiong, 2024.
Ki nongthep vote shynrang ki don 10,94, 947 ngut, ki kynthei ki don 11,22,150 ngut bad 3 ngut ki Third Gender.
Ha ka jingïalang bad ki lad pathai khubor tang hapoh khyndiat kynta ba ka Election Commision of India ka la pynbna ïa ka tarik ban pynlong ïa ka elekshon Lok Sabha, u Tiwari u la ong, ka jingkiew ki nongthep vote na u snem 2023 haduh kaba sdang jong ki ar bnai jong u snem 2024 ka long 55, 971 ngut.
Ki nongthep vote ba dang shu pynrung kyrteng thymmai ha ka Electoral Roll, 2024 ki long, 56,909 ngut, ki Service Voter ki don 3835 ngut, ki nongthep vote ba duna dkhotmet ki don 11179 ngut, ki nongthep vote ba la kynjoh 80 snem ka rta shaneng ki don 23, 793 ngut bad 5 ngut ki Non Resident Indian (NRI).
Ki Polling Station ki don 3512 tylli, ba kynthup 326 tylli ha ki jaka sor bad 3186 tylli sha ki jaka nongkyndong.
Haba ai jingkheiñ ïa ka jingpoi ki paidbah kiba thep vote ha Shillong bad Tura ha ki elekshon Lok Sabha ba la long ha u snem 2014 ki long 63.28 percent ha Shillong bad 79.14 ha Tura. Ha u snem 2019, ki nongthep ki long 65.48 percent ha Shillong bad 81.38 percent ha Tura. U CEO u la ïathuh ruh ba ka tnat Election ka la ïakren bad ki bor shipai BSF ba kin peitngor ïa ka khappud katba ka ri ka dang pynkhreh ïa ka elekshon.
Ha kaba ïadei bad ki jingrah pisa beaiñ, u CEO u la ong ba kan don ka komiti kaba kyrpang kaba peitngor ban kem ïa kino kino kiba donkti ban sam pisa hadien ba la pynbna ïa ka elekshon.
