Shillong, Lber, 16: Ki samla kiba ju kamai jakpoh da ki thuk thuk ban kit ïa ki nongleit jingleit kylleng ka sor Shillong ha ka sngi Saitjaiñ ki la ïakynduh lang ha madan Malki, Shillong ban shim rai kumno ban leh nangne shakhmat hadien ba la mih ka jingkhanglad ban kamai be-aiñ khlem da ka ïoh ïa ka Permit bad siew Khajna sha ka tnat Transports jong ka Sorkar Jylla.
Ha ka sngi Thohdieng u Commisisoner ka tnat Transports Bah E. Kharmalki ha ka jingïakren bad ki nongthoh khubor u la maham ïa ki paidbah ba kin hap ban shim hi ïa la ka jong ka jingkitkhlieh lada ki leit jingleit ne shong da ki Bike Taxi jong ka Rapido ne jong ki nongniah Scooty shimet bym pat ïoh Permit na ka tnat Transports ka Sorkar Jylla.
Ha ka jingïakren bad ki lad pathai khubor, u President ka Ride to Serve Bah K. Nongkynrih u la ong, “ïa ka jingkhein be-aiñ ngim sngew eiei namarba ngim dei ki khynnah kiba tuh na iing na sem bad nangne nangtai hynrei ka dei ka jaka kpoh jong ngi shimet bad ngi im da ka ki jong ki kti ki kjat. Ngi baroh ngi la rai beit ban kamai.”
“Ha ka taiew ban sa wan ngin sa leit ban ïakynduh ïa u Myntri ka tnat Transports ban ïakren halor kane,” ong u Bah Nongkynrih.
“Ngi la ai da ka jingthoh sha ka Sorkar naduh u snem baladep, hynrei haduh mynta ka Sorkar kam shym la jubab ïa ka jingthoh,” u la ong.
Ha ka 1 tarik, Nailur, 2023 ka Ride to Serve ka la aiti da ka shithi ha u Symbud Myntri Rangbah ka Jylla Bah Prestone Tynsong ban ai Permit bad siew khajna khlem da pynïasoh bad ki Aggregator kiba don hapoh kane ka jylla.
Haduh mynta, ka JETS 24×7 kaba don ïa ka Permit ka dei ka Aggregator ba nyngkong eh ha Meghalaya ban shakri ïa ki paidbah lyngba ki Bike Taxi.
“Ka ophis u DTO ka la pyllait ïa ka Permit hynrei ngi kiba kamai ynda ngi leit shim ïa ka permit ki ong ba ngi hap ban pynïasoh bad kiwei ki Kompeni. Ha ka jingthoh ba ngi la aiti ha u Myntri ka tnat Transports ngi la pynpaw ba ngi kwah ban siew ïa ka Permit bad siew khajna lyngba ka Sorkar bad ngim kwah ban leit lyngba jong kino kino ki kompeni,” ong u Bah Nongkynrih bad bynrap, “ngi kwah ban long ki nongkamai shimet bad ïohnong sha lade.”
Haba kylli, u la ong, “ngim dei kiba kamai bad ka Rapido. Ngi kamai da ka Scooty shimet bad dei na kata ka daw ngi sa ieng Offline bad ngi khlem pyndonkam ïa uno uno u App. Lada ngi siew ïa ka bai permit bad ka khajna sha ka Sorkar ngi hap ban siew sa ïa ka bai App sha ki kompeni namarba ki ohdor ïa ka bai kamai shi khlieh briew.
Katkum ka jingïathuh jong u Bah Nongkynrih, ki don 300 ngut tam kiba kamai shimet da ka Scooty.
