Nongpoh, Naiwieng 12: U nongñiah jong kawei ka trok kit maw Clinker ba la tip kyrteng kum u Hanpaïa Laloo na ka shnong Nongryngkoh, West Jaiñtia Hills u la mynsaw jur bad kdiah ki kjat, hadien ba ka trok kaba u ñiah ka la leit ban tynrah ïa kawei ka trok kaba ieng harud jong ka surok National Highway-6, ha ka shnong 12 Mer, Ri Bhoi District.
Kumba la ïohlum jingtip na ki bor pulit ka Ri Bhoi, la ong ba katei ka jingjia kadei kaba la jia ha ka por 4:30 baje mynstep katba katei ka trok kaba la ñiah da u Bah Hanpaïa Laloo kaba don ïa u number ML11 A 1436 ka dang hiar sha ki thaiñ Guwahati, hynrei ynda poi ha 12 Mer, ka la leit ban tynrah nadien jong kawei pat ka trok kaba don ïa u number NL 01 AD 5135 kaba ïeng harud ka surok ba la ñiah da u Bah Neverson Shadap.
Ki Pulit bad ryngkat ki Pulit ka Fire & Emergency Service ki la ïoh ban sei tad hadien 2 kynta tam ïa u Bah Hanapaïa uba la sahkut hapoh katei ka kali kaba la pra phom ha ki bynta ba shakhmat hadien ka jingïatyngkhuh.
Ïa u Bah Hanpaïa Laloo hadien ba la lah ban sei na ka jingsahkut hapoh ka trok la pynkit noh marmar sha Guwahati Medical College & Hospital (GMCH) na ka bynta ban ïoh ïa ka jingsumar kaba mardor bad ki Pulit ki dang pynlong ruh ïa ka jingtohkit kaba bñiah halor katei ka jingjia.
