2.2 lak ki nongthep vote ba la kynjoh 100 snem, 82 lak kiba duna dkhotmet

New Delhi, Lber 16: Ka jingdon jong ki nongthep vote hapoh ka ri India la sakhi ba la ki la nang kiew. Ïa kane la pyntip da ka Election Commission of India (ECI) ha ka sngi Saitjaiñ haba ai jingkhein ïa ka jingdon jong ki nongthep vote hapdeng ki kynthei, ki samla bad ki briew kiba don jingduna ha ki dkhotmet.
Ha ka jingïakren bad ki lad pathai khubor, u Chief ElectionCommissioner (CEC) Rajiv Kumar, ryngkat ka jingsynran lang jong u Election Commissioner ba kynthup ïa u Gyanesh Kumar bad u Dr. Sandhu ki la pynbna paidbah ïa ka Tarik ban pynlong ïa ka General Elections 2024 sha Lok Sabha bad ha ki Assembly jong ki Jylla.
Kawei na ki bynta ba kongsan ba la pynpaw da ka Election Commission of India (ECI) ka dei ka jingkiew jong ki nongthep vote khamtam hapdeng ki kynthei, ki samla bad ki briew kiba don jingduna ha ki dkhotmet. Kumba 82 lak ki nongthep vote ki dei kiba don jingduna dkhotmet, 2.2 lak kiba la kynjoh ïa ka rta kaba 100 snem, 48,000 hajar ngut ki Third Gender.
Kane ka elekshon kan sakhi ïa ka jingkiew ki nongthep vote ki samla kiba don 1.8 klur ban ïashim bynta ha ka jingthep vote ha ka sien kaba nyngkong eh ha ka jingim ka jong ki. Nalor kata, hapdeng ka rta 20-29 snem ki nongthep vote ki don 19.47 klur.
U Rajiv Kumar u la ong ba ka Commission kan pynthikna ba ka jingpynlong ïa ka jingïathep vote kan long da ka lynti kaba khuid, ban leh ruh da kaba tyngeh pyrshah ïa ki jingïalam bakla.
Da kaba bsut ïa ka phang, “Celebrating Inclusivity,” ka ECI ka la ïaiban ba ka jingpynlong ïa ka elekshon Lok Sabha ha kane ka kynti kan dei da ka lynti kaba khuid bad kaba bym don jingïashah liang.
Haba kyntu ïa ki paidbah ba kin ïashim bynta pura ha ka jingthep vote, u Kumar u la kyntu ïa ki nongshong shnong jong ka ri ba kin pyndonkam hok ïa la ka itkiar ba la pynkupbor da ka riti synshar jong ka ri India da ka jingïashim bynta ha ka jingïathep vote, khnang ba yn dup lah ban sngap ïa ka sur jong iwei pat iwei bad ban khein lang.