Shillong, Lber 16: Ka Sorkar Jylla Karnataka ka la thung ia u ïada Martin Marbaniang, IPS officer jong ka kynhun ne batch jong u snem 2009, kum u Commissioner of Police, ha Belagavi, Karnataka.
U la trei kum u DIG recruitment, ha Bengaluru. U la shakri ruh ia ka kam kum u SP ha Kalaburagi, u Head of Police Training College, Yadgir, bad u SP CID.
Kum u ba la im la kha bad kum u nongshong shnong ka jylla Meghalaya, u la pyndep ia ka eksam MA ha shwa ba un iakhun ia ki eksam UPSC.
Ka khubor ka iathuh ba un sa shimti ia katei ka kam na u Vikas Kumar Vikash, IGP, Northern Range, uba la bat ruh ia katei ka kam hapoh ka nongbah. La iathuh ba ia katei ka kam kaba la thylli ka la mih na ka daw ka jingshong thait noh jong u S.N. Sidramappa, ha ka 29 tarik u bnai Rymphang mynta u snem.
