Shillong, K’lyngkot, 06: U nongïalam jong ka Seng Congress u Rahul Gandhi uba la pynkhreh ïa ka jingïaid kjat ne ka Bharat Jodo Nyay Yatra un wan poi ha ka Jylla Assam ha ka 18 tarik mynta u bnai.
Ïa kane la pynbna ha ka jingïalang bad ki lad pathai khubor ha Rajiv Bhawan ha Guwahati.
Ha ka jingïakren bad ki lad pathai khubor, ka nongaiktien jong ka All India Congress Committee (AICC) ka Mahima Singh ryngkat bad u MLA ka Congress u Bharat Narah ki la ïathuh ba u Rahul Gandhi un sdang ïa ka Bharat Jodo Nyay Yatra na Sivasagar District Assam ha ka 18 tarik Kyllalyngkot.
La ïathuh ruh ba ka Bharat Jodo Nyay Yatra jong u Rahul Gandhi kan ïaid lyngba na ki 17 tylli ki district jong ka jylla Assam ban pyndep ïa ka jingïaid lynti kaba 833 kilometer. Kane ka Yatra kan ïaid lyngba ïa ka Amguri, Jorhat, Majuli, Dhemaji, Lakhimpur, Tezpur, Kaliabar, Nagaon, Guwahati, Hajo, Mukalmuwa, Senga, Barpeta, Howly, Sarbhog, Manikpur, Bongaigaon, Chapor, Bilasipara, Gauripur, Golakganj bad Bakshirhat.
Shuh shuh la pyntip ba ka jingïalang paidbah kan sa long ha Assam ha kane ka jingwan iuhkjat jong u Rahul Gandhi ha kane ka jylla. Baroh ki Presidents jong ka Congress Booth Level Committee kin sa ïashim bynta lang.
Ha kajuh ka por, shen yn sa pynlong ruh ïa ka jingïalang kaba heh ha Azara, Guwahati ban ïathir ïatai na ka bynta ka jingpynkhreh ïa ka elekshon Lok Sabha bad ïa ka Bharat Jodo Nyay Yatra ban sa pynlong da u Rahul Gandhi.
