Shillong, K’lyngkot, 06: U Bah Anjelus Mawlong u la mudui da ka ejahar sha ki Pulit da kaba pyntip ba ha ka 1 tarik, mynta u bnai ha ka por kumba 2 baje mynstep ki runar ki bym lah satia ban ithuh ki tuh ïa ka pisa kaba kot T. 1.5 lak bad ïa kiwei de ki mar kiba don hapoh ka ing jong u ha ka shnong Umsohlang Umsning, Ribhoi District.
Ha kawei pat ka jingjia, u Arjun Joshi u la ujor sha ki Pulit ba ha ka 29 tarik, Nohprah 2023 ha ka por kumba 11.40 baje mynstep u la lap ba ki runar ki bym lah ban tip ki la tuh ïa ki Secondary Battery na ka Junction Box jong ka CCTV Camera ba la pyndait ha Laban Cultural Club, Batti-Bazar, Laban, Shillong.
U Bah Albert Mawlong u la ujor sha ki Pulit ba ha ka 1 tarik mynta u bnai, ki runar ki la rong tuh ïa ka Scooter kaba don ïa u nombar ML-05Z-8012 na Nongthymmai Nongkhyriem, Shillong.
Ha ka 30 tarik, Nohprah, 2023 ha ka por kumba 3.40 baje mynstep, ki runar bym lah ban tip, ki la rong tuh ïa kawei ka kali Maruti Eeco van kaba don ïa u nombar AS-01EF-1519 kaba dei jong u Pawan Kumar Swami na Byrnihat, Ribhoi District.
U Ashutosh Kumar Paul, uba dei u nongñiah jong ka trok CG-04FL-2414 u la ujor sha ki Pulit, ba ha ka 29 tarik, Nohprah, 2023 ha ka por kumba 3.20 baje mynstep hynriew ngut ki runar bym lah ban ithuh durkhmat ki la sei jubor kumba 200 litre ka umphniang Diesel na ka trok jong u, kaba u la pynieng ha ka shnong Bhoirymbon, Ribhoi District.
U Bah Budlang Pohtmi u la ujor sha ki Pulit, ba ha ka 28 tarik, Nohprah, 2023, ki runar ki la prong tuh hapoh ka ing jong u ha ka shnong Mawblei Madanrting Block-I, Shillong bad rong tuh 4 tula ka ksiar.
U Siddhart Banerjee jong ka Star Cement Lumshnong, East Jaiñtia Hills u la ujor sha ki Pulit ba ha ka 12 tarik, Nohprah, 2023 ha ka por kumba 8.30 mynstep, ki runar ki bym lah ban ithuh durkhmat ki la rong tuh lai hajar tylli ki Bolts and Nuts, laiphew hynriew tylli ki Insert Plates, shispah khatar tyllli ki Drill Assembly bad ar spah arphew ar tylli ki Slotted Assembly, kiba shongdor kumba T. 1,88,17,808 klur na ka kudam buh tiar jong ka Kompeni.
U Company Commander, B-Coy, 4th Bn., BSF u la ujor sha ki Pulit ba ha 28 tarik Nohprah, 2023 ha ka por kumba 2.40 baje, uwei u shipai BSF na Hawaitilla BOP, West Jaiñtia Hills u la ïohkem ïa uwei u nong Bangladesh ïa uba la tip kyrteng kum u Salim Ahmed uba la 35 snem ka rta na ka shnong kaba dang hap hapoh ka Muktapur Patrol Post, West Jaiñtia Hills. Hadien kane, saw byrni u piat ba la thmu ban shalan beaiñ sha ka ri Bangladesh la ïoh kurup najan kawei ka khlaw kaba don hajan.
U Silseng M Sangma u la ujor sha ki Pulit ba ha ka 29 tarik, Nohprah, 2023, kawei ka kali Bolero pick-up kaba don ïa u nombar ML-08C-4955 ka la jah na Rongrak Gonganggre, South Garo Hills District.
