Kiei ki skim Sorkar Pdeng ba ki paidbah ki khlem ïoh, yn buddien ka BJP nangne shakhmat

Shillong, K’Lyngkot 06 : Ka Bharatiya Janata Party (BJP) ka la rai ban buddien nangne shakhmat halor ka jingpyntreikam ïa ki skim bapher bapher jong ka sorkar pdeng khnang ban tip bad lap kiei ki jait skim ba ki paidbah ki khlem ïoh.
Haba kren bad ki lad pathai khubor dang shen, u National Vice President ka BJP, u Dr. Chuba Ao ba dei peit ïa ka Meghalaya u la ong ba ka sorkar pdeng ha kine ki 9 snem tam hapoh ka jingïalam jong u Modi kum u Myntri Rangbahduh ka la wanrah bun ki jingmyntoi lyngba ki skim bapher bapher na bynta ki paidbah ka Ri.
Tangba u ong pat, “Don ki paidbah ki ba dei ban ïoh ïa kitei ki jingmyntoi kim pat ïoh satia.”
Katkum ka jingong jong u, ka sorkar pdeng lyngba ka jingpynshai paidbah ba la tip kum ka Sankalp Viksit Bharat ka la leit kylleng ban pynsngewthuh bad pynshai sha ki paidbah khnang ba kin tip shaphang kitei ki skim kiba ka sorkar pdeng ka mang kyrpang na ka bynta jong ki.
Ha kajuh ka por, ki nongïalam ka BJP ki la ong ruh ba kin sa ïa kren bad ka sorkar pdeng halor ka rukom kyrshan pisa sha Meghalaya kaba dei ka jylla kaba rit bad kaba dang bun ki jingkyrshan borbah na ka sorkar pdeng.
Shuh shuh haba jubab ïa ka jingkylli halor ka jingdon ki skim jong ka sorkar pdeng kiba ka jingkyrshan pisa kam dei shuh 90:10 persen bad don kiba poi mynta sha ka 80:20 bad don pat kiba poi 75:25, na ka liang u Gagan Jain uba dei uwei pat u nongïalam ka BJP na Meghalaya u la ong, “Ngin sa rah ïa kane ka ishu bad ka Ministry ba dei peit ban kyrpad ba kan pynjynsur khyndiat ïa ki kyndon.”
Lah ruh ban kdew ba ha ka jylla Meghalaya ki don bun bha ki skim jong ka sorkar pdeng kiba ki paidbah ka jylla ki myntoi khamtam eh ha kaba ïadei bad ka skim 100 sngi ba ju tip kum ka MGNREGA kiba ka bhah kaba bun la ka long na ka bai nongtrei haduh ka bai tiar ka wan na ka sorkar pdeng bad katto katne pat na ka sorkar jylla.