Shillong, Lber 19 : Ban lah pynthikna ba ka jingpynlong ïa ka elekshon MP Lok Sabha ha ka jylla kan long kaba ïaid beit ïaid ryntih bad kaba khuid ba suba, ka sorkar Jylla Meghalaya ka la pan 18 pyrton ki bor pahara ban pyndonkam ha ka por elekshon.
U Superintendent of Police ka East Khasi Hills u Rituraj Ravi mynta ka sngi Baar, ula ïathuh ba ka jylla Meghalaya ka la pan 11 pyrton ki Central Reserve Police Force (CRPF) bad sa 7 pyrton ki State Armed Police Force (SAPF).
Ula ong, ba na kitei ki 18 tylli ki pyrton, ka jylla kala ïoh shwa 3 pyrton bad kitei kila don hapoh ka jylla mynta.
Ar tylli ki pyrton CRPF kila don ban peit ïa ka jinglong jingman bad la bynshet ha ki ïa ka kam elekshon bad ïa kawei ka pyrton la buh ha ka nongbah.
Nalor kane u SP ula ïathuh ba ka tnad Pulit kala dep thaw ïa ka Flying Squad Teams (FST) bad ïa ka Static Surveillance Teams (SST) katkum ka jingbthah jong ka Election Commission of India (ECI) bad kine ki ar tylli ki kynhun kila sdang ban treikam shaid shaid.
Ula ïathuh ba ki pulit kila buh ïa ki jaka ban khmih bniah bad ban pynlong ïa ka jingkhynra ban pynthikna ba kan don ka jingpeitngor bha ha kylleng ki nongbah jong ki District bapher bapher.
Namar ba ka jylla Meghalaya ha hap ha ka Wat kaba Nyngkong ne Phase – I kaba don artylli ki Parliamentary Constituency, ka elekshon kan long ha ka 19 tarik u Iaiong.
U Superintendent of Police ka East Khasi Hills ula banjur ïa ka jingdonkam ban pynneh ïa ka shongsuk shongsaiñ bad ïa ka elekshon kaba ïaid beit bad ula kyntu ïa ki paidbah ba kin mih shakhmat ban leit thep vote khlem kano kano ka jingtieng ne jingshah pynbor.
