Shillong. Lber 19: Sa uwei pat u briew u la shah kem ha kaba ïadei bad ka jingjia pynbthei bom IED hapoh ka 9 tarik mynta u bnai hapoh ka Them ïew Mawlong, ong ki pulit ha ka sngi baar.
Utei uba la shah kem la ithuh kyrteng da u Namphyrnai Lyngdoh Peiñlang uba la 21 snem ka rta napoh ka shnong Peiñlang ha kaba u la shahkem na Mairang, Eastern West Khasi Hills bad la wan ïalam noh sha Shillong ha ka sngi Nyngkong.
“Da ka jingïarap jong ki pulit ka Mairang bad ki pulit ka Ri Bhoi, ngi la ïoh ban kem sa uwei. U la dei sa uwei uba la shah suba jur halor kane ka jingjia,” ong u SP ka East Khasi Hills u Rituraj Ravi.
U la ïathuh ba utei u briew uba la shah kem u la donkti bha bad ki dkhot ka seng lehnoh Hynñiewtrep National Liberation Council (HNLC).
Lah ban pynkynmaw ba ha ka 11 tarik mynta u bnai, u Tarson Lymba uba la 58 snem ka rta, uba dei u nongïalam ka seng HNYF, u la shah kem napoh Dawki katba ïa u Ebakordor Nongpluh ba la 26 snem ka rta na Shillong kaba ha ka thaiñ Malki ha kaba ïadei bad katei ka jingjia shah pynbthei bom.
Shuh shuh, ki pulit ha ka 12 tarik mynta u bnai ki la ïoh ban pynpulom ïa ka sleeper cell kaba la treikam bha jong ka HNLC bad ki la lah ban pynpulom ïa ka jingpyrshang ban pynbthei bom IED biang hapoh Sor Shillong bad Nongpoh.
Kumba 4 ngut ki dkhot katei ka seng ki la shah kem napoh ka thaiñ Ri Bhoi district. Ia kitei la ithuh kyrteng kum u Damanbha Ripnar ba ju khot sin u Shall Lapang, u Robinis Ripnar, u Jill Tariang bad u Shining Nongrum.
Hadien jong kane, na ka liang ka seng HNLC ha ka 14 tarik mynta u bnai, ka la kam ba ka la donkti ha kaba ïadei bad ka jingjia pynbthei bom IED ha ka 9 tarik mynta u bnai ha Them Metor, ha Them Ïew Mawlong bad ka aipor ruh shi bnai ïa ka sorkar jylla ban pynkynriah noh ïa ki 342 tylli ki longïng kiba sah hapoh ka Sweepers’ Colony.
Haba kylli ïa u SP u la ong ba ki pulit ki la pynkhlaiñ bha ïa ki bor pahara hapoh ka nongbah Shillong bad ha kylleng jong ka district.
