18 lak ki Tourist kiba wankai sha Meghalaya, duna palat ka jingpynbiang kali: Paul Lyngdoh

Shillong, Naitung 18: Wat hapdeng ka jingkiew ka jingwan kiba jngohkai sha ka jylla Meghalaya da palat 18 lak ngut kumba long haduh mynta, ka jylla ka mad ïa ka jingbym biang halor ka jingdawa bad ka jingdon jong ki kali ban ïarap ïa kane ka jingdawa kaba jur.
ïa kane la pynpaw da u Myntri ka tnat Tourism u Bah Paul Lyngdoh ha ka sngi Palei hadien ka jingïalang ban ïakren ïa ki lad ban pynsuk bad ban kamai jakpoh jong ki nongñiah kali tourist kiba na jylla hadien ba ka All Khasi Meghalaya Tourists Taxi Association (AKMTTA) ka la dawa ba dei ban khang noh ïa ki kali tourist kiba wan nabar ban kit ïa ki nongwan jngohkai na Shillong sha ki jaka jngohkai bapher bapher ka jylla.
Na ka liang u Bah Lyngdoh u la rai ruh ban sa khot shen da ka jingïalang bad ki nongpynïaid kali bad ki nongshong shnong ban ïakren halor ki mat bapher bapher khamtam halor ka jingdawa ban khang kamai ïa ki kali kiba wan bar jylla.
La bthah ruh ïa ka transport department ban pynbiang ïa ki jingkheiñ halor ka jingdon ki kali kiba don ïa u registration number jong ka jylla kaba dei ban long ha kine ki 10-12 sngi ban wan.
Haba kren sha ki lad pathai khubor u Bah Lyngdoh u la ong ba ka jingwan ki tourist sha Meghalaya ka la tam ïa ka 18 lak ngut.
“Ka jingdawa ïa ki kali ban leit buh ka la kiew hynrei ka jingdon pat ki kali ka neh kumjuh hynrei da ka jingsdang kum ka PRIME tourism vehicle, kaba ngi la pyrshang ban pynbiang ïa ki jingdonkam bad jingdawa ka la long kaba myntoi,” u la ong.
Haba ong ba kam don ka jingkylli ban khang ïa ki kali na Assam bad kiwei pat ki jylla, u Myntri u la ong, “Ngi hap ruh ban buh ha ka jingmut ba kine ki kali ba kit ïa kiba wan jngohkai ki don ruh ïa ki national permit ban kamai la kumno kumno ha ki 3 tylli ki jylla. Kane ka jingdawa ka dei ruh halor ka jingkiew ka ïoh ka kot ha kaba ki nongñiah ne ki trai kali kim lah ban pynbiang ïa ki jingdawa bad ban pynpoi ruh ïa ki nongjngohkai sha ki jaka ba ki kwah.”
U Myntri u la banjur ruh ba ka sorkar jylla ka dei ban pynthikna ba kino kino ki sienjam ban shim kim dei ban don ïa kano kano ka jingktah naba ym tang ki nongwan jngohkai kiba na Assam, kiba wan sha Shillong hynrei ki briew na Meghalaya ruh ki leit ha ki bynta bapher bapher jong ka Assam, bad kumta kino kino ki kam ban leh hap ban peit ba kin ym ktah ïa ka karkhana jngohkai jong ka Meghalaya.”
“Mynta ngi im hapoh ka juk digital kaba ngim donkam shuh ban book ïa ka kali da ka met, phi lah ban shu online bad ki don ki briew wat ha nongbah Delhi, kiba lah ban ai kum kane ka kam shakri ban pynïasoh beit ïa kiba wan jngohkai na Guwahati bad nangta sha Meghalaya,” u la bynrap.
Ha ka jingdawa na ka bynta ka Meghalaya ban jied ïa ka rukom pynïaid kam ka Sikkim, u Bah Lyngdoh u la ong ba ka Assam ka dei ka jaka rung sha Meghalaya.
“Ngi dang peit ïa ka Assam kum ka jaka rung sha Meghalaya. Ki don ki airport, ki don ki railway station bad ngi don ha ka kam shakri kaba ha tmier ïa kaei ba la pynbiang da ki kali ka Assam bad Meghalaya kiba wan sha Assam bad Meghalaya la kidei ki nongwan jngoh kai ne kiba leit phah sumar,” u la ong.