Nongpoh, K’Lyngkot 07: Kumba 15 ngut ki samla kiba la rung sha ka thup phainal jong ka Ri-Bhoi Super Star Season-2 kin ïaknieh ïaka nam lahduh haka 15 tarik mynta u bnai kaba dei ka Grand Finale jong katei ka lympung pyni sap rwai bad shad.
Ïa ka Grand Finale jong ka Ri-Bhoi Super Star Season-2 yn pynlong ha Umsning Auditorium naduh ka por 3 baje janmiet bad naka liang ki nongïalam jong ka LS Syiemlieh Production kaba la pynïaid ruh ïa katei ka lympung ba kynthup ïa u Bah LS Syiemlieh CEO bad u Bah Standwell Manih, kila khot bad wer ïaki paidbah ban wan sakhi ïa katei ka lympung ban ai mynsiem ïaki samla donsap namar ka jingthmu ba la pynlong ïa kane ka Ri Bhoi Super Star, Season-2, ka long ba sei madan ïa ka sap ka phong ki khun samla kiba don sap ha ka rwai ka siaw bad ka shad pynkhih syngkai bad lyngba kane ka ryngsan ki lah ban pynpaw pyrthei ïa ka sap kyrpang ba u Blei u la ai haki bad lehse lyngba kum katei ka rynsan kan long ruh ka lad aikam aijam ïaki khun samla lyngba ka sap kaba ki don.
Ki la ïathuh ruh ha katei ka sngi kin don ruh ki Kaitor bad ki Tyngshop ki Puron ba paw na ka jylla ban wan ai mynsiem ïa kine ki samla don sap ka Ri Bhoi District.
