Shillong, Risaw, 10: Khatsan ngut ki thei samla kin sa ïaknieh ban ïohphong ïa ka pansngiat Miss Shillong, 2024 ban sa pynlong shen da ka Fashion Society Shillong (FSS).
Ka Emichwa Daka B Ladia, ka nongïakhun banyngkong, kaba dang 19 snem ka rta ka dei ka samla kaba sngewtynnad ban leit shang pyrthei, kaba dap beit da ka jingkmen bad kaba angnud ban pynkupbor ïa ki samla ba dang khie dang san. Ka sngew ba ka jingim ka long kaba lyngkot palat na ka bynta kaei kaei kaba duna kumta ka ïaleh ban pynsah jingkynmaw ha ka jingim.
Ka Evanjeline Thubru, nongïakhun kaba ar kaba la 24 snem ka dei ka nongmihkhmat jong ka Models United Nations (MUN) kaba ju kren ban ai jingkyrshan na ka bynta ka koit ka khiah ha ka por kha khun ha ka kam jong ka kum ka nongpynïaid ïa ka Podcast jong ka tnad ka Koit ka Khiah kaba ka sngew ba ka dei ka lad ban hikai bad ban pynkupbor ïa ki kynthei.
Ka Mahima Sinha, ka nongïakhun kaba lai, ka ngeit ba kum ka nongïashim bynta ka kwah ban pyni nuksa sha ka pyrthei kaei kaba kham suk bad kaba kham shngaiñ na ka bynta ki kynthei. Ha ki jingkren jong ka, ki kynthei ki dei ka kpoh jong ka pyrthei bad ki dei ban shah pynkupbor bad ban rakhe. Wat lada pynphong ne ym pynphong ïa ka pansngiat, manla ka kynthei ka dei ka mahadei.
Ka Rimika Shylla, ka nongïashim bynta basaw kaba la 23 snem na Mihmyntdu, Jowai ka dang trei mynta kum ka Staff Nurse ha Woodland Hospital,Shillong. Ka ju ai jingkyrshan ïa ka jingpynsngewthuh shaphang ki jingktah ha ka bor jabieng lyngba ki Social Media bad ka ju pan jingkyrshan na ka bynta ka bha ka miat jong ki briew kiba la shah ktah ha kane ka jingpang.
Ka Gracey Nandi, ka nongïashim bynta basan ka dei ka samla pule Sociology bad ka kyrshan tyngeh ban kren ïa ka jingpang kaba ktah ïa ka bor pyrkhat pyrdaiñ. Ka sngewtynnat bha ban thaiñ jingthaiñ bad ka dei kaba la shah pyntbit bha ka jingshad Khatam bad pynkhih kpoh.
Ka Ellereen Mary Shanpru, ka nongïashim bynta ba hynriew kaba dang 16 ka dei kaba dang pule ïa ka Class-X kaba ju sngewtynnat ban rwai, ban shad, ban pule kot bad ban thoh. Ka angnud ban pynkup bor ïa ki kynthei bad ban pynïoh ïa ka hok pule jong ki khynnah bad ka sngew ba ka kamram jong ki samla ka long ban pyndonkam ïa ka bor jong ki khang ba kin long ka sur na ka bynta ka jingkylla.
Ka Lameca Passah, ka nongïashim bynta ba hynñiew, kaba la 24 snem ka dei kaba ju angnud ban long nongpynsleh jing pynbha, ka Model bad kaba thrang ban wad ïa ki buit thymmai ha ka jingim jong ka. Ka ngeit ba ym don kaei kaei kaba lah ban pynlip ïa ka ding jong ka na shapoh namarba ka don ïa ka jingngeit ba skhem ha lade. Ka tien phira jong ka, ka long “Lada ym dei mynta, te lano pat?”
Ka Melissa Hannah Mylliemngap, ka nongïashim bynta ba phra kaba dang 18 snem ka dei ka samla kaba dang pule ïa ka Bachelor’s Degree ha Shillong College. Ka ju angnud bha ban long kum ka Model bad ban ïoh lad ban ïaid ha ki rynsan pyni riam bad ka kwah ruh ban pyndonkam ïa kine ki rynsan ban ïalap pyrshah ïa ki jingshah thombor ha ka long rynïeng jong ki kynthei.
Ka Anouska Rana, ka nongïashim bynta ba khyndai kaba la 22 snem ka dei kaba dang pule ïa ka Graduate ha ka Commerce. Ki jingsngewkhia jong ka ki long halor ka jingbym don ka jingshngaiñ kaba biang na ka bynta ki kynthei ha India. Ka sngew ba kum ka nongïashim bynta ha kane ka rynsan ïakob, ka lah ban khring ïa ka jingmut jingpyrkhat bad ban shimkhia ban leh eiei halor kane ka mat.
Ka Angelina Jackson, ka nongïashim bynta ba shiphew kaba la 20 snem ka rta ka dei ka nongmareh ha ka National Level. Ka la jop ïa ka National bad State Award ha ka jingïakob dro bad kum ka nongmareh ba stet tam. Ka la kren pyrshah halor ka jingpyndonkam ïa u drok bad ka la ieng ruh ban ïarap ïa ki samla, kiba ka ïohi, ba ki la shah ktah bad ngat ha ka shrip, ha kane ka bynta.
Ka Pragati Thapa, ka nongïashim bynta ba khatwei, kaba dang 16 snem ka dei ka samla pule jong ka St.Margaret’s Higher Secondary School. Ka sngew ba manla uwei pa uwei ki dei ban long wad bniah bha khnang ba ka lawei kan long kaba phyrnai bad ka la ieng pyrshah ruh ïa ki jingeh kiba wan hakhmat.
Ka Nikita Nongrum, ka nongïashim bynta ba khatar kaba dang 17 snem ka rta ka dei kaba dang pule ïa ka Class-XII. Ka ju angnud ban long ka sur na ka bynta ki khynnah kynthei kiba shah pynshitom beiñ bad shah lehbein ha ka imlang sahlang.
Ka Eileen Mercy D.Nongrum, ka nongïashim bynta ba khatlai, kaba dang 19 snem ka rta kaba la ïoh phong pansngiat ha ki rynsan ïakob ka ngeit ba kum ka nongïashim bynta kan dup lah ban pynkylla ïa ki briew sha ka jinglong kaba bha tam. Ka ieid ïa ki khynnah bad ïa ki mrad bad ka ju angnud ban long ka nonghikai ïa ki khynnah rit shisien ka sngi.
Ka Loretta Laloo, ka nongïashim bynta ba khatsaw, kaba la 21 snem ka rta ka dei kaba dang pule ïa ka Masters h aka sobjek History ha NEHU. Ka dei ka thei ïalehkai Basketball ha ka National Level, ka ju leh ïa ki DIY bad sngewtynnat ban pule kot. Ka ngeit ba ki por ba kyrpang ki wanrah ïa ka jingïathuhkhana ha ka jingim jong ka, ha ki jingmut jingpyrkhat, ha ki jingshah tynjuh bad ha ka jingshem thymmai.
Ka Jyoti Bhardwaj, ka nongïashim bynta ba khatsan kaba la 22 snem ka rta ka dei ka samla ba dang pule ïa ka Medical. Ka jingïalehkai Basketball ka dei kaba ju sngewtynnat bha bad ka sngew ba ka jingpyndep ïa ka jingpule ha ka Medical bad ka jingphaikhmat sha ka rynsan ïakob thei bhabriew kan long kum ka jingshakri ïa ki parabriew bad ka ju pynpaw ruh halor ka jingsngewkhia ïa ka jingpyndonkam ïa u drok hapdeng ki samla.
