SHILLONG, Nailar 02: Ka long ka burom ba ka jingsarong ïa ka ri bad ka jaitbynriew hadien ba ki nongïalehkai Karate ba mihkhmat ïa ka Jylla hapoh ka lama jong ka All Meghalaya Karate Do Association [AMKA] ki la wanrah nam da kaba khur haduh 10 tylli ki takma na ka 8th International Karate Championship – Indian Challenger Cup, 2024 kaba la pynlong ha Netaji Indoor Stadium, ha Kolkata.
Kumban shu pynkynmaw, ka AMKA ka la phah 22 ngut ki nongïalehkai Karate ban leit ïashimbynta sha kane ka Championship ha Kolkata hapoh ka jingïalam jong ka Ester Mary Lyngdoh bad u Bah Pynhunlang Kharbuli.
Kane ka lympung Karate kaba lai sngi lynter la sdang naduh ka 26 tarik haduh 28tarik u Naitung, 2024. Ki takma ba ki nongïalehkai Karate ka AMKA ki la ïoh ban khur ki kynthup ïa san tylli ki takma ksiar, ar tylli ki rupa bad lai tylli ki rnong.
Ki kyrteng jong ki nongïalehkai kiba la jop takma ki long – Takma ksiar: Ka Phidaiakashisha Lyngdoh (Girls Individual Kumite Cadet -54 kg), ka Iwannaki L. Khongji (Girls Individual Kumite Cadet -42 kg), u Ferrando Wanniang (Boys Individual Kumite 13 years -45 kg), u Nongpoknganba T. Kharmawphlang (Boys Individual Kumite 13 years -40 kg), u Aibor Jyrwa (Boys Individual Kumite 12 years -40 kg).
Kiba khur Takma rupa: Ka Phindasumarlin Rani (Women Individual Kumite -45kg), bad ka Lapyntngen Mary Lamin (Girls Individual Kumite 12 years -40 kg).
Takma rnong: Ka Cathy Sweety Nongrum (Girls Individual Kumite junior -42 kg), ka Feliza Hujon (Girls Individual Kumite cadet -54 kg)bad ka Rupaly Deka (Girls Individual Kumite cadet -42 kg).
