10 sngi ai por ka KSP ïa ka sorkar ban plie lehniam ki Hindu ha Mawjymbuiñ

Shillong, Nohprah 15 : Ka Kutumba Surakshya Parishad (KSP), ka seng ki Hindu, ka la dawa bad aipor 10 sngi ïa ka Sorkar Meghalaya ba kan plie biang noh ïa ka krem Mawjymbuiñ na ka bynta ka jinglehniam ki Hindu.
Kane ka seng kala byrngem ruh ban pakhang ïa baroh ki surok ba kongsan kiba wan sha Meghalaya ba kynthup ïa ka Jorabat bad Paikan, lada kane ka jingdawa jong ki kam urlong hashuwa ka Khristmas.
Ka kynrum kynram halor ka krem Mawjymbuiñ ha Mawsynram, kaba jngai kumba 60 km na Shillong, kala ïaid mynta la katto katne bnai. Kane ka krem mawshun kaba don u Mawjymbuiñ uba ki Hindu ki ngeit ba u dei u blei Shiva. Hynrei, naduh ka 6 tarik Nailar 2024, ka Dorbar Shnong ka Mawsynram kala khang ïa ka jinglehniam hapoh kane ka krem da kaba kdew ïa ki daw bapher bapher.
Kane ka kam kala poi ruh sha ka jingbishar jong ka ïing Bishar High Court ka jylla, kaba la bthah ïa ka Sorkar Jylla ba kan ïakren bad ki kynhun bapher bapher ha kaban ïapynbeit ïa ka kam.
Wat hapdeng kane, u President ka KSP u Satya Ranjay Borah ula kam ba ka Sorkar kam shym la leh eiei ïa kane ka kam.
Haba dawa ban plie biang ïa ka jingleh niam ki Hindu ha kane ka jaka, ula dawa ïa ka Sorkar Jylla ban khanglad ïa kino kino ki kam ki bym ïahap ha sawdong jong kane ka krem.
U Satya ula kynnoh ruh ïa ka Sorkar halor ka jingbym larkam bad jingbym shimkhia ïa kane ka kam haba kynnoh ïa ki bor ka Sorkar kynthup ïa ka Deputy Commissioner bad Superintendent of Police ba ki khlem pyndep ïala ka kamram.
Ka KSP kala byrngem ban pakhang lynti ïa ki surok ba kongsan kiba wan sha Meghalaya ba kynthup ïa ka Jorabat (Guwahati), Paikan (Goalpara), lada ym plie noh ïa kane ka krem ban lehniam ki paid Hindu hapoh ka por bala buh.
Ula ong ba lada mih kino kino ki huri hura, ka Sorkar Jylla kan hap ban shim ïa ka jingkitkhlieh.