Leit shimti u CM bad Dy.CM ïa ka jaka bantei ïa ka Meghalaya House-II ha Navi Mumbai

Shillong, Nailar 8 : U Myntri Rangbah u Conrad K Sangma bad u Symbud Myntri Rangbah bah Prestone Tynsong ki la leit ban shimti pura ïa ka jaka ban tei ïa ka Meghalaya House-II ha Kharghar, Navi Mumbai, ka ban ai shibun ki jingmyntoi ïa ki nongpang bad ki samla pule ka Jylla bad ka thaiñ Shatei Lam Mihngi ruh kumjuh.
U Myntri Rangbah ka Jylla Conrad K Sangma ula pyntip ïa kane ha ka rynsan social media, haba ban jur ba kane ka project ka dei kaba la pynwandur ban pynsuk ïa ka leit ka wan ki paidbah ka Jylla sha kane ka nongbah kaba dei ka pla tyngka jong ka Ri.
“Ia ngi, kane kam dei tang ka jingtei ïa ka building ba thymmai. Ka dei ka jingpynthikna ba haba ki briew jong ngi ki leit sha Mumbai, ban leit sumar, pule puthi, treikam lane kino kino ki kam, kila don ka jaka ban sah kaba ki sngew kum ka ïing la jong” ong u Myntri Rangbah.
Da ka jingnang bun ki nongshong shnong ka Meghalaya ki ba leit sha Mumbai khamtam ban leit sumar jingpang bad leit pule ïa ki kyrdan kiba shalor, ka Meghalaya House-I ba don mynta ha Vanshi ka la mad ia ka jingeh ban ai jaka ïa baroh.
“Kane ka jingtei ban mih ha Kharghar la khmih lynti ba kan nang pynkhlaiñ bun shah ïa ka rukom ai jingkyrshan bad pynbiang ruh ïa ki nongleit nongwan na Jylla” ula pynpaw.
Nalor ka jingshakri kum ka Guesthouse, ki Ophisar ki la ïohi ba ka Meghalaya House-II kan long ka rynsan ka ban pynïasoh ïa ka kolshor hapdeng ka thaiñ Sepngi ka Ri India bad ka thaiñ Shatei Lam Mihngi.
U Myntri Rangbah ula pynpaw ïa ka jingsngewnguh ïa u Myntri Rangbah ka Maharashtra Devendra Fadnavis bad ka Sorkar Maharashtra namar ka jingïatreilang bad ka jingkyrshan ban pynurlong ïa kane ka jingaiti ïa ka jaka, ka ban plie lynti ïa ka jingïadei kaba khlaiñ ha ka ïoh ka kot bad ka kolshor hapdeng ki ar Jylla.