Rai ka KSU ban ym pdiang ïa ka hukum u DC rai ban pynlong rally hakhmat u Mot Kiang Nangbah

Shillong, Nailar 8: Ka Khasi Students’ Union (KSU) ka la kyntait ban pdiang ïa ka hukum u Deputy Commissioner (DC) ka East Jaintia Hills kaba khang ban pynlong ïa ka jingïalang paidbah ha Khliehriat ha ka 11 tarik Nailar bad pyntip ruh ba kan pynïaid shakhmat ïa katei ka jingïalang la ka long da ka jingïoh jingbit ne khlem ka jingbit.
Ha ka shithi sha u DC ha ka 7 tarik Nailar, ka KSU ka la pynrem jur ïa ka jubab ba la ïoh haka 6 tarik Nailar kaba kdew ïa ka hukum ka BNSS katkum ka kyndon 163 jong ka 20 tarik Jymmang 2026 kaba khang ban ïalum 5 ngut ne palat hajan ka Ophis DC.
Ka KSU kala ong ba kane ka hukum kala kut por. “Ka kyndon S. 163(4) jong ka BNSS ka ong ba, kano kano ka hukum katkum kane ka kyndon kan nym lah ban treikam palat ar bnai naduh ba la pynjari ïa ka.’ Kumta, ka hukum ba la mynjur ha ka 20 tarik Jymmang, 2026 ka la kut por” ong ka KSU.
Ka la kynnoh ruh ba katei ka jingkhang ban pynlong jingïalang ka long ban khanglad ïa ka jingdawa ban weng noh ïa u DC halor ka Public Hearing kaba la ong baka 31 Naitung daka ba kynnoh ruh ba ki bor district kila pyndonkam bakla ïa ka bor.
Ka KSU ka la ong ba ka kwah ban pynlong ïaka jingïalang hakhmat u mot jong U Kiang Nangbah kaba don hapoh ka phyllaw Ophis DC da kaba ong ba ka dei “ka dak jong ka jingai mynsiem ïa ka Union.
Ka KSU ka la dawa ba dei ban ai jingbit mardor bad ka la pynmih ruh ïa ka jingmaham. “Ka KSU ka dawa ba phin pynmih ïa ki hukum kiba donkam kiba ailad ïa ka seng ban pynlong ïa ka jingïalang hakhmat u mot jong U Kiang Nangbah. La kumno kumno ruh lada ka don ka jingbym lah na ka ophis jong phi ban pynmih ïa kajuh, kata kan nym khanglad ïa ka Seng ban pynlong ïa ka jingïalang paidbah kaba suk ha Khliehriat ha katei ka sngi bad ka por ba la kdew” ong ka KSU.