Shillong, Risaw, 14: Ki nongïalam ka Khasi Students Union (KSU) ha ka jingïakynduh ïa u Symbud Myntri Rangbah ka Jylla Bah Prestone Tynsong uba peit ïa ka tnat Kam Pohing ki la twad jingmut ruh halor ka Meghalaya Residents Safety and Security Act (MRSSA).
“U Bah Prestone u la ong ba ka Sorkar Jylla ka la ïoh ïa ka jubab na ka Ministry of Home Affairs (MHA), ka Sorkar India halor kane ka mat,” ong u kyrwoh ba la phah da u General Secretary u Samla Donald V. Thabah.
“U Bah Prestone u la ong ba ka Ministry of Home Affaris ka la ailad ïa ka Sorkar Jylla ban pynbit pynbiang bha ïa ka MRSSA hashwa ban pyntreikam pura ïa ka ha jylla,” la ong u kyrwoh.
Ka KSU ka la buh jingkylli ruh halor ka mat Inner Line Permit (ILP) hynrei u Bah Prestone u la jubab ba ka dang sahkut sah ha ka Sorkar Pdeng.
Ka seng ka la pynsngew ba ynda la pyntreikam pura ïa ka ILP ha Meghalaya kumba long ha Arunachal Pradesh, Mizoram, Nagaland bad Manipur, ka seng kan sa ïa pynbeit bad ki paidbah bad Sorkar halor ka ishu Lynti Rel.
