Ai jingmut ka KSU ïa ka Sorkar MDA ban shna ïa ki De-Addiction Centre manla ki District

Dei ban kheiñ ïa kiba kyrni ha u drok kum ki nongpang

0

Shillong, Risaw, 14: Ka Khasi Students’ Union (KSU) ha ka jingïakynduh dang shen ïa u Symbud Myntri Rangbah ka Jylla u Bah Prestone Tynsong ka la ai jingmut ïa ka Sorkar Meghalaya Democratic Alliance (MDA) ban shna kham bun ki Rehabilitation Centre/De-addiction Centre ha manla ki shnong jong ka Sor Shillong.
Ka jingïakynduh ïa u Symbud Myntri Rangbah ka Jylla da ki nongïalam ka KSU ba la lamkhmat da u President u Samla Lambokstarwell Marngar ka long hadien ba la ïohi ïa ka jingshimkhia jong ka Sorkar ban ïa treilang lang bad ki nongïalam Niam ban rat dyngkhong ïa ka jingjyllei jong u drok na ka jylla Meghalaya bad na ka Jaidbynriew Khasi.
Ka seng ka sngew ba ka jingïatreilang hapdeng ka Sorkar, ki kynhun Niam, ki nongsynshar shnong bad ki bor Hima lem bad seng treimon sngewbha ka dei ka dak ban pyni ïa ka jingsdang ban ïakhun pyrshah ïa ka jingwan rung jong u drok sha jylla uba rung pat ha ki khynnah skul bad ki samla haduh ban da pynjot thiaw ïa ka jingim jong ki bad kaba ktah kylla pat ïa ka iing ka sem, ïa ka shongsuk shongsaiñ bad ka imlang sahlang.
Ki nongïalam ka seng ki la ïathir bad ïasyllok janai bha bad u Symbud Myntri Rangbah uba peit ruh ïa ka tnat Kam Pohing halor ka jingbampong jong u drok ïa ka imlang ka sahlang bad kumno ban tehlakam ban pynduh jait shi syndon ïa une u jingdih ba sniew.
Ki nongïalam ka KSU ki la pynpaw ïa ka jingsngew bynñiaw halor ka jingsynjor jong ka aiñ ban pynshtiom ïa ki nongkhaii drok ha kaba wat kito kiba la snar bha ha kane ka kam ki kloi ban lait na phatok.
U samla Lambok u la pynsngew ruh ha u Symbud Myntri Rangbah ba ïa ki nongdih kiba im kyrni ha u drok dei hap kheiñ kum ki nongpang bad ka donkam ïa ka Sorkar ban seng ïa ki jaka ai jingsumar lane ki Rehabilitation/De-addiction Centre ha manla ki shnong ha Sor Shillong.
U la pynsngew ruh ba u drok mynta u la ksam wat shaduh ki shnong barit sha nongkyndong. U la kyntu ïa ka Sorkar ba ka dei ban buh ïa kine ki jaka ai jingsumar ha baroh ki thaiñ naduh ki kyrdan District, Sub-Division bad Block.
Ha kaba ïadei bad ka jingjyllei jong ki nongkhaii drok, ka KSU ka la lap bunsien ha manla ki shnong ki thaw haba ki dkhot ka seng lem bad ki nongsynshar shnong ki ju ïoh kem ïa kine ki snar khaii drok, la ïohi ba tang da ki bnai lane taiew ki la lait na phatok bad ki la bteng biang ïa kane kajuh ka kam.
Ka la don ka khep ruh ha South West Khasi Hills, ha kaba u nongkhaii drok u la ujor ejahar kylla pyrshah ïa ki dkhot ka KSU haba ki kem ïa u. Ka KSU ka la pynsngew ba lada ka aiñ NDPS ka dang ïai tlot bad synjor kumba long mynta ka mut ka jingdih bad khaii drok kan kynrei palat shah namar ka jingtlot ka aiñ kan nang ai mynsiem shuh shuh ïa ki briew ba na jylla bad khamtam kiba nabar jylla ba kin pynlong ïa ka jylla kum ka ktem khaii bad dih drok, la ong ka Seng ha u kyrwoh ba la phah da u General Secretary u Samla Donald V. Thabah.
“Ka jingrung u droks lyngba ki bar jylla ka shyrkhei bha lyngba ka jingïohi na ki lad pathai khubor haba bunsien kiba shah kem ki dei beit kiba na shabar kumba la sakhi ha East Jaiñtia Hills,” la ong ka Seng.
U Symbud Myntri Rangbah u la ong ba ka tnad Pulit lem ba ka tnad Social Welfare ki la ïatreilang kumno ban tehlakam ïa ka jingdih bad khaii drok ha jylla. U la pyntip ba la pynkha ïa ka Advisory Committee ka ban bishar ïa ki nongkhaii drok bad ka jingpynshitom kan ym long shuh tang da ki taiew ne ki bnai hynrei wat da ki bun snem ruh.
U la pyntip ruh ba ka Sorkar kan sa ïasyllok bad baroh ki nongïalam seng treimon sngewbha, ki seng niam bad ki nongsynshar shnong ban pynduh jait ïa ka jingdih drok ha jylla kaba la kylla sha ka jingbymshong shngaiñ ka imlang ka sahlang lyngba ka tuh ka thiem, ka thok ka shukor bad ka lute.
U President ka KSU u la pynpaw ruh ba ka Sorkar ka dei ban khot ïa ki nongaikhubor ban sakhi lang bad pyni paidbah haba ka tnad Pulit ka thang ïa ki drok ba la ïohkem ha kaba wat u Symbud Mmyntri Rangbah ruh u la kular ban bishar ïa kane ka jingdawa.

Leave A Reply

Your email address will not be published.