Ynda la mynjur ïa ka AoEB yn sa lah tehlakam ïa ka jingwan sah beaiñ kiba nabar: Dy. CEM

Shillong Naitung 12: Kum shi bynta ban tehlakam ïa ka jingwan sah beaiñ ki briew nabar jylla bad bar Ri hapoh u pud u sam ka KHADC, ka Council ka la bthah ïa baroh ki shnong ban bud ïa ki kyndon bad jingbatai jong ka Council.
Ïa kane la ïathuh da u Symbud CEM ka KHADC u Bah P N Syiem uba khmih ruh ïa ka tnat Elaka haba jubab ïa ka jingkylli u MDC ka Mawthadraishan u Bah Jambor War halor ki bynta ka EC ban tehlakam ïa ka jingwan sah beaiñ kiba nabar jylla.
U Bah War u la ong ruh ba na kadaw bym don ka jingtehlam bad jur ka jinglaitlan, bun ki bar jylla bad khamtam ki bar Ri ki shong ki sah beaiñ kum ha Lum Survey bad kiwei.
Haba kylli la katei ka jingbthah ka KHADC ïa ki shnong ban bud ïa ki kyndon kadei kaba mynshwa ne kaba mynta, u Bah War u la kylli ruh ïa ka EC la ka la wad jingtip ne em shano ki bar jylla ne bar Ri ki don hadien ba la shah kyndang na Lum Survey.
Katba u MDC ka Nongkrem u Bah Lambor Malngiang u la kynnoh ïa u Rangbah Shnong ka Umsur uba la ai lad ïa ki nong Bangladesh ban sah ha katei ka shnong.
Haba jubab ïa kine jingpynpaw ki dkhot ka Ïing u Symbud CEM u la ong ba ki kyndon badei ban bud da ki shnong ban tehlakam ïa ki jingwan sah beaiñ kiba nabar ki la don naduh mynshwa.
“Naduh ka 30 tarik u Jymmang, 2023 la dep pynmih ïa ka jingpynbna ba pyrkhing ka jingai Residential Certificate bad ban pynkhlaiñ shuh shuh ïa ka jingtehlakam ïa ka jingwan ki briew nabar kan long satang da la ïoh ïa ka jingmynjur jong u Lat haba ïadei bad ka Administration of Elaka Bill (AoEB), 2024 naba kane ka bthah ïa ki shnong ban buh record naduh kiba shongwai, kiba die dukan, ki don ki kyndon kiba khang ban wansah ne leh business khlem da leh ïa ki record shnong kane kan ïarap shibun ban tehlakam ïa ka jingwan kiba nabar,” ong u Bah Syiem da kaba bynrap ba un sa pan jingtip na ka Hima Mylliem, ki Rangbah shnong ïa kiba sah beaiñ ha Lum Survey bad Maxwell ton estate kaba ha kench’s trace.