Yn ym sei kyrtong MP ka KHNAM yn kyrshan ïa ka Party bym ïatrei bad ka BJP

Shillong, Kyllalyngkot 07: Ka Khun Hynniewtrep National Awakening Movement (KHNAM) kan ym sei kyrtong ban ïakhun ïa ka elekshon MP Lok Sabha hynrei kan shu ai jingkyrshan ïa kano kano ka seng saiñ pyrthei ka bym don jingïadei bad ka seng BJP.
Haba ïakren bad u Working President ka KHNAM Bah Thomas Passah ula ong, ba ka KHNAM kan ym pynïeng kyrtong ha ka elekshon MP Lok Sabha 2024 hynrei kan shu ai jingkyrshan noh ïa kano kano ka seng ka bym don jingïadei bad ka seng BJP.
“Ka seng kala dep shim ïa ka rai ban ym pynïeng kyrtong ha ka elekshon MP Lok Sabha hynrei shen kin sa shong ïa ka jingïalang ban shim ïa ka rai ïano ban ai jingkyrshan bad ïa mynta hi ka seng kan pynleit jingmut beit tang ha ka elekshon MDC” ong u Bah Thomas Passah.
Ula ong, haduh mynta ka seng ka la ïaid shaphrang ha ka ban pynkhreh ïa ka elekshon MDC bad kila don palat 20 ngut tam kiba la pan tiket ban iakhun na ka KHNAM ha ka elekshon ka KHADC.
“Kila don kumba 20 ngut kiba la ai da ka jingthoh bad kiba la pynpaw da ka ktien ba ki kwah ban ïakhun ïa ka elekshon MDC na kylleng ki Constituency” ong u Bah Passah.
Ula ong ba ka KHNAM ka la dep thaw ïa ka State Election Committee ba kan bishar ïa kitei kyrteng jong kiba pan tiket bad hadien kane ka Central Executive Committee kan sa pynbna ïa ka kyrteng jong ki kyrtong ban ïakhun ïa ka elekshon MDC na ka seng.
Lah ban ong, ha ka elekshon MLA 2023 ka KHNAM kam shym la pynïeng kyrtong bad mynta ka kynti ruh kala rai ban ym pynïeng kyrtong haka Elekshon MP Lok Sabha.