Yn ym ailad shuh ïaki bar jylla ban register jaka ha Raid Marwet lait naki trai muluk : Syiem Raid Marwet

Nongpoh, Jylliew 25 : U Paiem Ken Syiem, Syiem ka Raid Marwet u la pynmih syndon da ka hukum ba ki bar jylla kin nym lah shuh ban register jaka hapoh pud u sam jong ka Raid Marwet lait noh tang ki trai muluk jong ka jylla Meghalaya, namar ka jingbun jong ki jaitbynriew kiba nabar jylla kiba wan thied jaka ha ki thaiñ khappud jong ka jylla Meghalaya bad Assam kiba dei ki shnong kiba hap hapoh ka jingpeit jingkhmih jong ka Raid Marwet.
Naka liang u Syiem ka Raid Marwet u la lum ruh da ka jingïalang ban ïakynduh ïaki paidbah ki bym dei ki trai muluk bad kiba shong ba sah haka jylla Meghalaya, ban ïakren bad thir sani halor ka thied bad die jaka haka thaiñ khappud khamtam haka shnong Pilangkata, Maikhuli, Umtyrnga Barapathar bad kiwei kiwei.
Naka liang u Syiem u la pynshai ruh ba kito kiba la shong la sah slem ha katei ka thaiñ ki lah ban register ïaki jaka jong ki hynrei ïa kito ki bym pat register bad kiba thmu ban thied jaka kim lah shuh ban register bad wat ka NOC kim ioh shuh lait noh tang kiba don ïaka Schedule Tribe Certifictae naka jylla Meghalaya.
Shuh shuh naka liang u Syiem u la kren shai ruh ha kaba ïadei bad ka jingpoi ki phetwir naka jylla Manipur ba kim dei ban kam trai ïaki jaka hynrei ka dei tang ka jaka rieh jong ki ba shipor bad kyrpad ruh ba ki dei ban ai ka jingïa treilang bad ki Raid, ki Dorbar Shnong bad kumjuh ki bor pulit, khnang ba kan nym mih kano kano ka huri hura bad ka jingkulmar ha katei ka thaiñ.