Yn wan phai ki 40 ngut ki samla pule Meghalaya ka EM College na Bangladesh sha Tripura

Shillong, Naitung, 19: U Myntri Rangbah ka Jylla u Conrad Kongkal Sangma ha ka sngi Thohdieng u la ïathuh ba ki don palat 405 ngut ki samla pule na ka ri India ha kaba 80 ngut kiba dei na ka jylla Meghalaya, ki la ïohlad ban mih na ka ri Bangladesh bad ban wan phai noh sha la ïing lyngba ka khappud na ka shnong Dawki, West Jaintia Hills District hadien ba ka la mih ka jingïakhih kaba jur ha ka ri Bangladesh ha kaba 38 ngut ki briew ki la ïap bad bun ngut ki la mynsaw jur.
Ka khubor ba la ïohlum dier por ka la ïathuh ba ki don 127 ngut ki samla pule ka ri India bad 40 ngut ki samla pule na kane ka jylla Meghalaya kiba pule ha Eastern Medical College, kiba la sahkut ha ka ri Bangladesh ha ka Campus jongka college bad mynta la pynkhreh ban pynbiang bor pahara ba kin mih noh da ka Bos lashai mynstep por 10 baje ban wanphai sha India lyngba ka khappud Sonamura kaba don hajan ka Agartala, Tripura.
Kine ki 40 ngut ki samla pule na Meghalaya kin sah shwa ha Agartala bad kin sa wan ha ka sngi U Blei bad lada ka jingïakynad hapoh ka ri Bangladesh ka dang jur kin sa wan phai da ka liengsuiñ sha la ïing.
U la ïathuh ba ka Sorkar Jylla ka la ïakren bad ka Indian Embassy kaba don ha Dhaka ban ai jingïarap ïa ki samla pule na ka Jylla Meghalaya lada donkam.
Haba pynpaw ka jingsngewkhia halor kane ka jingjia, u Sangma u la ong, “tang shu ïoh jingtip halor kane ngi la phah ai jingïarap mar mar kumba 405 ngut ki samla pule na ka ri India ban ïoh pyllait im na ka ri Bangladesh bad ban wan ïalam sha la ka ri lyngba ka Dawki bad na kine, kumba 80 ngut ki dei na kane ka jylla Meghalaya bad kiwei pat ki dei na ki jylla bapher bapher jong ka ri. Ngi don ruh ïa ki samla pule kiba dei na ka ri Bhutan, Nepal bad kato katne ngut ki nongjngohkai pyrthei kiba la wan lyngba ka khappud na Dawki.”
U la ong ruh, ka don ka jingsngewkhia halor ka jingsahkut jong ki 40 ngut ki samla pule na Meghalaya kiba pule ha Eastern Medical College
“Ngi la ïakren bad ki ophisar bad ïa ki bor ba dei peit jong ka Indian Embassy watla na ka liang jong ki bor pynïaid College ki la ong ba ka jinglong jingman ka biang hynrei ki kmie ki kpa ki sngewkhia ïa kane ka jingjia,” u la ong.
“Nga kwah ruh ban pyntip sha ki kmie ki kpa ba ngi dang ïai bteng ban wad jingtip halor ka jinglong jingman,” u la ong bad ïathuh ruh ba tad ynda la pynthikna ba ka leit ka wan ka la shngaiñ yn sa lah ban pynpoi ïa ki haduh khappud la ka dei sha Tripura ne Dawki ruh. Ngi ïai peitngor beit baroh 24 kynta ïa ka jinglong jingman,” la ong u Sangma.
Haba pyntip ba bun na kiba la wan phai kin rung ruh na Tripura, u Sangma u la ong, “Ngi la ïakren bad ka Sorkar Tripura, ngi la ïakren bad ka High Commission ha Bangladesh bad ki ophisar jong ngi ki la ïakren ban wad ïa ki lad ki lynti ban wan ïalam sha la ïing ïa ki samla pule tang shu pynthikna ba ka leit ka wan ka la shngaiñ.
Shuh shuh u la ïathuh ba ka Sorkar ka la rai ban buh ruh shen ïa ka Online Portal ban ïoh ïa ki mobile number jong ki samla pule kiba dei na ka jylla Meghalaya, kiba pule shabar jong ka ri. Katkum ka jingong jong u, ka Sorkar ka la ïakynduh jingeh shikatdei na ki jingjia ba ladep namar ka jingbym don ïa ki mobile number jong ki samla kiba pule shabar ka ri India.
U la ïathuh ba ïa kane ka jingtyrwa yn sa ïakren ha kawei pat ka jingïalang kynhun Myntri ka ban sa long na ka bynta ban ïoh jingmynjur.
“Kan sa don ka Online Portal bad ngi kyntu ïa ki samla na Meghalaya kiba pule shabar ri ba kin register bad ban ai ruh ïa ki mobile phone, khnang ba lada don kino kino ki jingjia ngin dup lah ban ai jingïarap tang ha ka shikhyllipmat bad ba ngin dup lah ban ïoh ïa ki jingtip kiba bniah lada don kino ki jingjia hadien habud kiba lah ban jia sha kylleng ki ri ka pyrthei,” la kyrpad u Myntri Rangbah.