New Delhi, Nailar 19: U coach phutbol ba pawnam ha ki por ba ladep bad u ba long ruh mynta u FIFA Chief jong ka Global Football Development, u Arsène Wenger, shen un sa wan ïuhkjat ha India ha ki taïew ba ar jong u Risaw ban pyndep noh ïa ka jingthmu ban plie ïa ka central academy ha India hapoh ka jingkhmih jong ka All-India Football Federation (AIFF), katkum ka khubor kaba la pyllait da u President jong kane ka synjuk, u Kalyan Chaubey.
U Chaubey ryngkat bad u Secretary-General jong ka AIFF, u Dr. Shaji Prabhakaran ki la ïoh ban pynlong ïa ka jingïalang bad u Wenger, u Steven Martens, Technical Director, FIFA, bad u Ulf Schott, Head of High-Performance Programmes, FIFA, ha Sydney, Australia, hynne ka Sngi Saitjaiñ, ban rai halor ka jingïatreilang jong ka FIFA bad ka AIFF ban plie ïa ka academy na ka bynta ki khynnah ba dang hapoh ka rta 13 snem jong ki shynrang bad kynthei.
Shuh shuh na ka liang jong u Chaubey u la pynpaw hadien ba la pynlong ïa kane ka jingïalang “Nga sngew kmen ban ngi la ïoh ban poi shaduh kane ka khyllipmat ban shim ïa ka rai ban plie ïa kane ka academy ha India, ryngkat ka jingïatreilang bad ka FIFA, ryngkat bad u Arsène Wenger u ba la long ka bynta kaba khraw ha ka jingpyrshang ban pynurlong ïa kane. Nga sngew thikna ba lyngba kane, ngi lah ban kyntiew ïa ka phutbol ha ka India.”
La bna khubor ba u Wenger un sa pyntip halor kane lyngba ka press conference kaba un sa ai ha u Nailur, kaba bud hadien ka jingpynkhreh ka jopng u ban wan ïuhkjat sha India ha ka taïew ba ar jong u Risaw, la pyntip u Chaubey.
Na ka liang jong u Dr. Prabhakaran u la ong, “Ngi khmihlynti ban pdiang sngewbha ïa u Arsène Wenger ha India na ka bynta kane ka project kaba heh. Ngam don jingartatien ba kane kan long shisha ka lad ban kyntiew ïa ki player bad ruh ban sei ïa ki rang bad ki thei kiba kynsai na kane ka ri India.
“U dei u briew u ba la ai mynsiem ïa kiba bun, bad da ka jingïatreilang bad u, ngin sa nanglah ban khring ïa kiba bun ki khynnah kiba don ïa ka sap lehkai,” la ban biang u Prabhakaran.
