Haba khot tender ïa kiwei ki kamra, kumno ka MS Rocky Dhar ka ïoh ïa ka Ground Floor

Shillong, Nailar 18: Ka Voice of the People Party (VPP), ka la dep aiti ïaka jingthih ha ophis jong u Myntri Rangbah ka jylla, u Conrad Sangma ha kaba ïadei bad ka jingaiti ka tnad GAD ïaka Ground Floor jong ka Meghalaya House, Kolkata, Russel Street sha ka MS/ Rocky Dhar Private Ltd.
Ha kane ka jingthoh ka VPP ka la ïathuh ruh ba ha ka jingshisha ka jingkhot tender kam dei na ka bynta ka Ground Floor jong kane ka ïing bangla ka jylla ha Kolkata, hynrei kadei na ka bynta kiwei pat ki kiamra. Hynrei kumno pat kane ka Ground Floor ka leit poi ha ka kti jong ka MS Rocky Dhar Pvt. Ltd. “Ka long kaba lyngngoh shibun bad kadei ka jingleh kaba ki paidbah ki donkam ban ïoh jingshai”, la ong ka jingthoh na ka VPP.
Lah ban kdew hangne ba hynnin ka sngi ka VPP lyngba ka kyrwoh ba la pyllait da u General Secretary, u Dr. Ricky AJ Syngkon, ka la pynpaw ka jingsngew kyndit bad sngewsih ban tip ba ka tnad GAD(A)jong ka Sorkar  Meghalaya ka la aiti ïa ka Ground Floor jong ka Commercial Complex ha Meghalaya House, Russell Street Kolkata sha kawei ka Kompeni shimet ba la tip kum ka MS/ Rocky Dhar, Umkdait Nongmensong, Shillong ban treikam na katei ka mala ba trai duh jong ka Meghalaya House.
Ha kane ka jingthoh ba la ai sha u Myntri Rangbah, ka Seng ka la ong ba kaba kham kyndit shuh shuh ka long ba mynta kane ka mala kadei ka jaka treikam jong ki lai tylli ki department bad ki corporation jong ka sorkar, kata ka Tourism Information Centre jong ka Directorate of Tourism, nangta ka Directorate of Horticulture bad ka Meghalaya Handlooms and Handicrafts Development Corporation Ltd, State Government Emporium.
Ka Seng ka ong ba ka jingbuh ïa kine ki tnad treikam ha kane ka Commercial Complex ka long ban pynpaw pyrthei ïa ki jingmih bad ki tiar na Jylla bad ka jingai jingtip ba donkam ïa ka Jylla ha ka kam shang pyrthei.
Kane ka jingleh ki bor Sorkar ka pynpaw shai kdar bad kane ka sorkar ka shakri ym ïa ka jingdonkam ki paidbah, hynrei ka shakri ïa ka jingmyntoi ïa ki riew shimet.
Ka Kyrwoh na ka Seng ka ong ruh ba ka sngewthuh ruh ba ka sorkar ka la lah ban ai ïa ka tender sha ka MS/ Rocky Dhar hadien ba ka la pyrshang la lai sien lai wat ban ai ha kane ka Kompeni shimet.
Ka VPP ka ong ba ka kwah ban tip bad ka sorkar kadei ban pynshai kumno ne ha kano ka dur la pynkylla ïa ki kyndon kat haduh ba ka lah ban pynïoh ïa ka tender ha ka kompeni jong une u riew shimet.