Yn tohkit ki Pulit la ka NLCN ka donkti neem ha ki kam dawa pisa ha kyrteng ka HNLC
Shillong, Nailar 19 : Ki pulit ka Jylla ki la rai ban tohkit bniah la ka kynhun lehnoh ba dang mih thymmai, kata ka ‘National Liberation Council of Nongkyndong’ ka donkti neem ha ka jingdawa pisa ha kyrteng ka Hynñiewtrep National Liberation Council (HNLC).
Na ka liang u Deputy Inspector General of Police (Eastern Range), Davis NR Marak u laong, “Ngi dang wad bniah bad ngin sa peit la kadei shisha ka HNLC lane kiwei pat namar ki kynhun ba thymmai (kum ka NLCN) ki la mih bad paw pyrthei.
Shuh shuh u ong ruh ba ka NLCN bad kawei pat ka kynhun ba tip kum ka Ri War Development Organisation (RWDO) kaba la sdang paw kum kawei ka kynhun lehnoh, ki la pynïasoh lang bad ong ruh ba ki lah ban don kiwei pat ki kynhun kiba shim kabu ïa kane bad dawa pisa ha kyrteng ka HNLC.
“Ïa kine baroh ngin sa tip ynda ngi la dep tohkit ïa ki (dkhot ka NLCN),” u la ong.
Shuh shuh u la ïathuh ruh ba haduh mynta ym pat don satia ba wan ban ujor ejahar halor kitei ki jingshah dawa pisa. “Ki lanot kim mih da ka mon lade hynrei ngi la rejistar ïa ka case,” la bynrap biang u Marak.
Katkum ka jingïathuh jong u, ki la don 11 ngut ki nongïalam bad ki dkhot ka NLCN kiba la shah kem na kylleng ki bynta jong ka rilum Khasi bad Jaiñtia Hills.
Kitei ki shithi dawa pisa ki mih ruh ha ka por ba ka jingïakren ïasuk hapdeng ka sorkar pdeng, sorkar jylla bad ka HNLC ka dang shu sdang bad don ha ka lynti ban jam shakhmat.
Na ka liang ki pulit ka jylla ki la pynpaw ruh ba ka HNLC ka dang dei ka kynhun lehnoh bad kumta kino kino kiba noh synniang ha kano kano ka rukom kin ngat ha kti jong ka aiñ.
Da kaba kyntait ïa ka jingdonkti ha ki kam dawa pisa, ha ka kyrwoh kaba pyllait dang shen na ka liang ka HNLC ka la kyntu ïa ki pulit ba kin shimkhia ïa kane ka bynta bad kem ïa kiba donkti khnang ban pyntikna ba ka jingïakren ïasuk kan long kaba ïaid beit.
Tangba, halor ka jingong jong ka HNLC ba katba dang ïaid ka jingïakren ïa suk ba ki paidbah ki lah ban noh synniang sha ka Council, na ka liang u DIG u la ong, “Haduh mynta ka HNLC ka la dei ka kynhun beaiñ bad kumta kino kino ki jingnoh synniang lane ki jingïarap kin ngat beit ha kti jong ka aiñ.” Shuh shuh u ong ruh ba kino kino kiba leh ïa kitei ki kam noh synniang sha ka kynhun, lada ki bor pulit ki tip bad don ïa ki sakhi kin sa leh katkum ki kyndon jong ka aiñ.