Jowai, Nailar 19: Ka Hynñiewtrep Border Disputed Redressal Forum lyngba u Chairman jong ka mynta ka sngi kala kyntu bad maham ïaki paralok Karbi khamtam kiba shong basah hapdeng ka Elaka Labang Nangphyllut Pangam Raliang bad West Jaiñtia Hills District ba kim dei ban thaw ïa kino kino ki jingkulmar kiban wan rah ïaka jingïa sngewpher jaitbynriew bad ki jingïa um snam.
Ka Forum ka jubab ruh daka ba tyngeh ïaki jingkren jong u Mirjeng Kro u nongïalam jong ka Karbi Students Association (KSA) halor ki mat jingkren jong u bad kim pdiang ïa kata ka rukom pynbeit pud da kata ka Give and Take Policy bad da ka jingkwah jong ki paitbah. Halor kane u Chairman jong ka u ong ba kane ka dei ka rai jong ki ar sorkar ban pynbeit ïa u pud u sam. Kumta ka shong haki laki pdiang ne kim pdiang, hynrei ym dei ban pynkulmar ïaki paitbah. Kiba ïeng beit kat kum ka Notifications 13.4.1951 kaba long ka Constitutional Rights ka jong ki.
Shuh shuh u ma Sungoh ula ong hooid ngim lah ban len baka don shisha kata ka Notification bad ka long ruh kumta hi, hynrei ki Karbi ki dei ban tip ïaki jingshisha hashwa jong kane ka Notification bad hadien jong kane ka Notification. Kum ki nongshong jong ka Block-1 bad ka Forum ki ïeng beit halor ka nongrim ba ma ki kidei ki trei ri trai muluk bad kane ka Notification kadei kaba shu leh thok bad shu leh donbor daka Sorkar Assam bad kim pdiang ïakata.
Kumta ka Notifications 1955, 1957 bad ruh kat kum ka Joint Ground Demarcations jong ki artylli ki Districts Councils ka United Cachar Mikirs Hills bad United Khasi Jaiñtia Hills haka snem 1958 ïa kaba la pdiang bad mynjur ban Re-transfer biang ïaka Block-1 Block-11 na United Cachar Mikirs Hills sha ka United Khasi Jaiñtia Hills.
Ka Forim ka ong ba kum ki pait nongshong shnong bad ki trai trai muluk trai jaka ki don ka hok ban dawa ïaka hok jong ki. Haba kane ka jaka ka dang dei ka Disputed Area kat kum bala kubur hi daka Sorkar Assam. Hynrei kum ka Forum ki ïaleh pat daka lynti ka hok bad daka lynti ka aiñ, ymda kaba ïarah wait ïarah suloi lane daka ba ïa umsaw umsnam. Ka Forum ka kyntu ruh ïaki paid nongshong shnong jong ka Block-1 ba kim dei han sheptieng lane artatien halor kane ka jingkren jong u ne u nongïalam jong ka KSA, hynrei kidei ban long kiba shlur bad kiba ïengskem hala ka jong ka nongrim. Khatduh ka Forum ka ong ruh ïaki Karbi bad lada jia baki sdang shwa maki te ki paid Khasi Pnar ruh kum banse ban ïada ïalade bad kin ym shah jem shuh.
