Shillong, Nailar 25: U Myntri sorkar ba peit ïa ka tnad Arts and Culture u Bah Sanbor Shullai u la pynpaw ba ka sorkar, lyngba ka tnad Arts and Culture kan maramot bad tei thymmai biang ïa u mot jong u nongialeh laitluid u Subhash Chandra Bose bad u SwamiVivekanand kiba la shah pynjot dang shen ha R.R Colony Umpling Shillong.
U Bah Shullai u la pynpaw ba ka jingnoh synniang jong baroh arngut ki nongialam ka long kaba don jingmut bad kaba donkam sha ka jingtei ïa ka ri.
U la pynpaw ba ngi kum ka imlang sahlang kaba la nang la stad ngi dei ban pynthikna ba kano kano ka rukom jingiakhih ka dei ban long kaba suk namar ka jingktah ïa kano kano ka jingpynjot kaba mih na ka jingshah thombor bad ka jingktah kaba sniew ïa ka jingroi bad jingkiew jong ka jylla.
U la pynpaw ïa ka jingsngewsih kaba khraw ïa ka jingshah pynjot jong ki riew paw khmat jong ka ri katba u la kyntu ïa ki samla ban bud ïa ki jinghikai na ki.
