Yn shimbynta 28 tylli ki jylla ha ka Elite Men’s Boxing C’ships ka ban long ha Shillong
Shillong, Naiwieng 10: Ka Meghalaya Boxing Association bad ka Boxing Federation of India ki la snohktilang ban sa pynlong ïa ka rynsan ïakura kaba la tip kum ka 7th Elite Men’s Boxing Championships ha ryngkat ka jingkyrshan na ka tnat ba dei khmih ïa ka Sport jong ka sorkar jylla Meghalaya.
ïa kane ka rynsan ïakura Championship kan sdang naduh ka 25 tarik mynta u bnai Naiwieng, 2023 haduh ka 1 tarik u Nohprah, bad la khmihlynti ba kin don ki rangïakura na kumba 27 lane 28 tylli ki jylla ryngkat bad ki Union Territory ki ban sa wan shimbynta ha kane ka lympung ka ban long ha nongbah Shillong.
ïa kane la pyntip da u Bah Larry Kharpran-Joint Secretary BFI bad ruh Organising Secretary na bynta ka 7th Elite Men National Boxing Championships 2023, ha ka jingïadon ryngkatlang u Bah Cornelius Kharhunai-President MBA, u Bah Khrawkupar Kharmawphlang-Joint Secretary MBA,u Bah Dondor Marweiñ-Secretary MBA, u Bah Daniel W Marbaniang-Treasurer MBA.
Haba ai jingkren sha ki lad pathai khubor hynne ka sngi na ka liang jong u Bah Larry Kharpran u la pynbna ba ka Kong Isawanda Laloo-Director jong ka tnat Sports & Youth Affair i ban sa long kum i Chairman jong kane ka rynsan ïakura katba u President ka MBA, kum u Co-Chairman. U la pynpaw ba mynta ka kynti ki khmihlynti ïa ka jingwanshimbynta kumba 28 tylli ki jylla ryngkat ki synjuk bad ruh ki Union Territory ha kane ka Championships ka ban long ha Shillong.
Shuh shuh, u la bynrap ba kane ka jingpynlong ïa kane Championships ka hap hapoh ka jingkhmih jong ka Boxing Federation of India ha kaba ïadei bad ka jingthmu ban jied rangïakura ba kynsai ki ban mihkhmat ïa ka ri ha rynsan ïakura jong ka Paris Olympics ha u snem ban wan.
Na bynta kane ka rynsan ïakura na ka liang jong ki bor pynïaid ki la phiah haduh 13 tylli ki kyrdan, kata 46-48 kg, 51kg, 54kg, 57 kg, 60 kg, 63.5 kg, 67 kg, 71kg, 75kg, 80kg, 86kg, 92kg bad 92 kg shaneng.
Nalor kane, yn sakhi ruh ïa ka jingwanshimbynta katto katne ngut ki khlur ïakura ba kynsai jong ka ri, kiba kynthup ïa u Govind Sahanin (RSPB) u ba la ïohrung quarter final ha ka World Boxing Championships 2021 kaba long ha Belgrade, u Shiva Thapa (Assam) u ba la bat hynriew sien ka namlahduh ha ka Asian Championships, nangta u Rohit Tokas (RSPB) u ba la jop takma rnong ha ka Commonwealth Games 2022 kaba la long ha England, ryngkat bad kiwei kiwei.
Ha kaba ïadei bad kane na ka liang jong ka Meghalaya Boxing Association (MBA) ka la khmihlynti ban sei madan kumba 10 ngut ki rangïakura ban ïakhun ha katei ka rynsan ka ban sdang ha ka 25 tarik mynta u bnai.