Yn sdang treikam noh ka Hospital sumar tynrai ba 7klur ha Ri Bhoi
![](https://mawphor.com/wp-content/uploads/2022/05/mawphor-1.jpg)
Shillong, Naiwieng 08 : Ka KHADC shen kan sa plie noh ïa ka hospital sumar tynrai lane ka Khasi Traditional Medicine Institute kaba la tei bad pynbit pynbiang ha ka jinglut kaba 7 klur tyngka ha u Lum Sohpetbneng, Ri Bhoi District.
Haba pyntikna ïa kane, u CEM ka KHADC, Bah Pynïaid Sing Syiem u la kubur ba katei ka jaka sumar tynrai ka la biang nadong shadong bad kaba sah ka long sa tang ban plie noh ïa ka.
“Kane ka jaka sumar tynrai kan ai ka jingshakri ym tang na ka bynta kiba wan shim dawai hynrei kan don ruh ka jaka sah na ka bynta ki nongpang kiba hap ban shah sumar kumba long ha kiwei pat ki hospital,” ula ong.
La ïathuh ba ïa mynta hi kum ka jingsdang, kin pdiang shwa tang kumba 20 ngut ki nongpang bad hadien kane pat kin sa peit.
U CEM haba batai bniah shaphang kane ka jaka sumar, ula ong ba ka jingsumar kan dei beit da ka jingsumar tynrai bad ki nongsumar lane ki doktor kidei kiba la tbit ha katei ka laiñ ai dawa bad sumar tynrai.
Katkum ka jingong jong u, na ka liang ka Council ka la kwah ban plie noh kham kloi ïa ka la kumno kumno mynta u snem hi.