Ym don jingïapher jingmut hapoh ka NPP halor ka jingjied kyrtong MP na Shillong.

Shillong, Naiwieng 08 : U nongai ktien ka NPP ba dei ruh u Myntri ha ka sorkar jylla, Marcuise N Marak ha ka sngi Balang u la ong ba kam don satia ka jingïapher jingmut ne ka jingïapait hapdeng ki nongïalam ka party haba ïadei bad ka jingjied ïa ki kyrtong MP na bynta ka elekshon MP kaban sa long shen na Shillong.
“Kadei ka seng sainpyrthei, kadei ka kynhun jong ki nongïalam bapher bapher bad kumta kan don beit ka jingïa pyni ka jingïakdew bad ka jingai jingmut. Ngi dei ka party kaba shim beit ïa ka rai jong uba bun balang bad kumta ban ïoh ïa kata ka sur donkam ka sur u ba bun la ka jong ka jong ka jingai jingmut. Kumta halor kane ruh ngin rai lang beit da ka sur jong uba bun,” u la ong.
Shuh shuh u ong ruh ba ka komiti kan sa phah ïa ka kyrteng jong ki kyrtong sha ka high command jong ka party kaban sa shim pat ïa ka rai kaba khatduh kino napdeng kine kiba kham don ka jingkyrmen ban jop.
Kane ka jingkren jong u, ka la wan hadien ba ki la mih ki khubor ba ka don ka jingïapait hapdeng ki nongïalam ka party na ka bynta ban jied ïa ki kyrtong kiban aireng na Shillong parliamentary constituency.
Na ka liang utei u nongïalam ka party ula ong ruh ba kim pat tip katno ngut ki don watla ki tip ba ka kyrteng jong u Bah HM Shangpliang MLA barim ka Mawsynram ka la don ha ka thup. U ong ruh ba um pat tip shaphang ka kyrteng u Dasakhiat Lamare hynrei la katta ruh u ong ba kin sa peit bad lehse kin sa tip mano mano namar khatduh dei ka party kaban rai.
Ha kajuh ka por u ong ruh ba um pat ïoh jingtip satia halor ka khubor ba u MLA barim ka Umroi, Bah George Lyngdoh u kwah ban pynïasoh sha ka NPP.