Nongstoiñ, Nailur 02: U Deputy Commissioner, West Khasi Hills District, Bah Garod LSN Dykes u la pyntip bad pynbna sha ki nongshong shnong jong ka West Khasi Hills District, ba ka sorkar India ka la dep ban pyntreikam bad pyllait ïa ka NAMASTE Scheme, da ka jingthmu ban pynthikna ïa ka jingshngaiñ bad ka burom jong ki nongtrei ha ki jaka pyntuid jaboh, ki jaka lum jakhlia bad ki nonglum jaboh.
Hapoh kane ka skhim la don ruh ki kyndon kiba la buh ryntih kiba kynthup naduh ka jingpynpaw ïa ki nonglum jaboh bad ka jingpynbiang ïa ki ID Card. Ka jinghikai halor ka jingshngaiñ ha ka kam bad ki jingma ha ka kam bad ka jingpynïaid kaba shngaiñ. Ki jingpynbiang ïa ki tiar PPE kiba ïadei bad ka aiom bad katkum ka jingdonkam. Ka jingpynbiang ïa ka koit ka khiah hapoh u Ayushman Bharat-PMJAY.
Ka jingïarap pisa na ka bynta ka kali lum jaboh IOJ 5 tylli ki jaka lum jaboh. Ka (DWCC) sha ki nonglum jaboh bad ki kynhun ba ïarap ïalade jong ki, lada jia ba ki long kiba la pynbeit kum ki nongpynïaid bad ki nongseng kam seng jam.
Na ka bynta ban ïoh jingmyntoi lyngba kane ka skhim, la kyntu ïa baroh ki nonglum jaboh jabaiñ hapoh ka district, ba kin wan mih ha khmat ki nongkheiñ ba la aiti ha kawei pa kawei ka shnong. Lah ruh ban rejistar ha ki ophis jong u BDO ka Nongstoiñ bad Mawshynrut, kumjuh ruh kum ka ophis jong ka komiti Shnong Nongstoiñ, ophis jong u Deputy Commissioner West Khasi Hills District shuwa ka 12/09/2024 ha ki kynta treikam, ryngkat ki kot donkam ba kynthup ïa ka phom kaba batai bniah shaphnag ïalade, ar tylli ki dur passport, ki kot jingtip shaphnag ki bank jong ki EPIC/Aadhaar Card bad ki kot pynshisha ïa ka jaka sah jong ki.
Ha kajuh ka por u Deputy Commissioner West Khasi Hills District, u la pyntip paidbah ba ka Sorkar India ka la dep ban pyntreikam ïa ka aiñ kaba la tip kum ka ‘Prohibition of Employment as Scavengers and their Rehabilitation Act 2013’, kaba la dep ban pyntreikam naduh 19 tarik u Nailur 2013.
Hapoh kane ka aiñ la khang pyrshah ban pynïaid pathar ïa ki jaboh briew na ki septic tank sha ki nala, ne ki thliew, ne ki lynti ki syngkieng bad kiwei kiwei, la ka dei da ki riew shimet, ki bor synshar shnong, ki kontraktor bad ka dei ka hok bad ka jingkitkhlieh jong uwei pa uwei u briew ban leh khuid leh suba. Kumta la kyntu ïa baroh ban burom bad bud ryntih ïa kitei ki kyndon jong kane ka aiñ.
