Shillong, Risaw 11 : Ki nonghikai jongka North Easern Hill University Teacher’s Association (NEHUTA) ki la rai ban pynkhlaiñ biang ïa ki jingïakhih jogki da kaba pynlong da ka jingïaiaid paidbah bad shong kyllaiñ myngngor ha ka Sngi Palei kum ka dak ban pynpaw ka jingpyrshah ïa ka jingleh tam bad palat pud jong une u Vice Chancellor ba mynta u Prof P.S Shukla.
La phah ruh ïa ka jingthoh halor kine ki jingleh tam bad jingleh beaiñ jong une u Prof Shukla hapoh kine ki arsnem ba u la don ha ophis sha u President ka ri India bad sha u myntri ka tnad pule puthi jongka sorkar pdeng, ong ka kyrwoh na ka seng.
U President ka NEHUTA u Prof Lakhon Kma u la ïathuh ba ka Association ka ïeng pyrshah ïa u VC na ka daw ban ïada ïa ka lawei ka University.
“Ngi la rai ban pynlong ïa ka jingïaïaid paidbah bad shong kyllaiñ myngngor pyrshah ïa u VC kumta la kyrpad ïa baroh ban ïasnoh kti lang ha katei ka 12 tarik ha ka por 3 baje janmiet hakhmat ophis ka NEHU Library bad na kane ka jaka yn ïaid sha ophis u VC ban shong kyllaiñ myngngor kum ka dak ka jingpyrshah ïa u” ong u President da kaba kyntu ruh ïa ka MCTA, NEHUSU bad NEHUNSA ban ïasnoh kti lang ha katei ka sngi.
“ Ngi ïakhun pyrshah ïa kine ki jingleh beaiñ jong u ban ïada ïa ka hok jong ki dkhot ka Academic Council kiba u la pyrshang ban thombor.Lada ngi pdiang kan long kum ka jingma hadien habud da kaba ailad ïa u VC ban ïaid lait ïa ki bor ka Council ha kiba bun ki bynta kiba ïadei bad ka bha ka miat jong ka University” ong biang u Prof Kma.
U la ïathuh ba ka NEHUTA ha ka jngïalang jongka kaba la long ha ka 6 tarik Risaw ka la ïakren sani bha halor ka jingdawa ban khot noh ïa ka jingïalang ba kyrkieh ong ka Academic Council nalor ba la dep phah ruh sha u da ka jingthoh ba la ïasoi da 100 ngut ki dkhot na Shillong bad Tura Campus hynrei u la lehklet bad leh bymsuidñiew halor kane nalor ba la dep ai por ïa u ban khot hapoh ka 9 tarik u Risaw bad la dep maham ruh ba lada um khot ka Association kan pynlong da ki prokram ïa khih kiba tyngeh.
Ka daw ba la phah lum kyrkieh ïa ka jingïalang ka long ban ïakren halor ka jingpyntreikam kyrkieh ïa ka NEP 2020 ha ki kyrdan UG jong ki College kiba la pynïasoh bad ka NEHU. ïa kane la leh khlem da ïoh ka jingmynjur na ka Academic Council.
