Yn sam khusnam ka RLSS&CO ïa ki samla pule ba wanshakhmat kiba dei na Shillong South

Shillong, Naitung 30 : Ka Raid Laban Sports, Social and Cultural Organisation (RLSS&CO) ryngkat ka jingïatreilang bad ka Sorkar Jylla, ka la khot ïa ki samla pule kiba la pass bha ha ki eksamin bapher bapher ban aplai na ka bynta ka 23rd Meritorious Award, kaba long ka khusnam tang na ka bynta ki samla pule kiba dei ki nongshong shnong ba pura jong ka 19 South Shillong Constituency.
Katkum ka kyrwoh, ki samla pule kiba la ïoh First Division bad shaneng ha ki eksamin SSLC, HSSLC, ICSE, CBSE, ISC bad NIOS jong u snem pule 2025-26 ki lah ban aplai. Nalor kata, yn ai ruh ïa kane ka khusnam sha ki samla pule kiba don jingthut ha ka met (Differently Abled) bad ki samla pule ba wan na ki longing ba kham duna ka ïoh ka kot, kiba la pass ha kino kino ki kyrdan.
La pyntip ba ïa ki application form yn sam na ophis kaba don ha ïing sah jong u MLA ka South Shillong, Bah Sanbor Shullai, ha New Kench’s Trace, Shillong-4, naduh ka 30 tarik Naitung haduh ka 10 tarik Nailar 2026, naduh 9:00 baje mynstep haduh 12:00 baje mynsngi.
Na ka liang ka RLSSSCO ka la pyntip ruh ba ki Topper na man la kawei pa kawei ka category kin ïoh ruh ïa ka Laptop kum ka jingithuh ïa ka jingjop jong ki ha ka pule ka puthi.