Nongpoh, Jylliew 02: Ki nongïalam ka Ri-Bhoi Dorbar kila pyntip ba ka jingrakhe ïaka jingdap 31 snem ka Ri-Bhoi District mynta u snem kan long haka 5 tarik Jylliew kaba dei ruh ka sngi rakhe ïaka sngi pynneh mariang namar ka 4 tarik kaba dei ka sngi bala ju rakhe ka hap haka sngi u Blei, bad mynta ka kynti ka jingrakhe kan long ha baroh 4 tylli ki Block jong ka Ri-Bhoi ba kynthup ïaka Bhoirymbong Block, ka Umsning Block, ka Umling Block bad ka Jirang Block khnang ba ki paidbah baroh kin ioh ban shim bynta lang ha katei ka sngi.
Haba kren sha ki lad pathai khubor, u Bah GS Shadap Secretary ka Ri-Bhoi Dorbar haka jingdonlang u Bah RR Makdoh Adviser, Bah RB Shadap President, Bah Ploster Syiem Vice President, Bah Nicky Kharthangmaw, u la ong ba une u dei u snem ba la shong pyrkhat baroh shisnem kaei ban ai sha ki khun jong ka dong Ri-Bhoi haka sngi dap snem jong ka District Ri-Bhoi, namar haduh u snem 2022 ki khun jong ka Ri-bhoi baroh kawei kim ioh bapli ban sakhi ïa katei ka sngi namar la rakhe beit ïaka ha District Headquarter ha Nongpoh, katba ki paidbah jong ka thaiñ Eastern Ri-Bhoi, Western Ri-Bhoi kim ioh ban don bynta lang.
“Dei ha kane ka kynti kum ka Dorbar ka don ka jingsngewkhia ha kaba ïadei bad ka jingbym ioh bynta lang ban shim bynta ha katei ka sngi naka liang ka Dorbar kala phah ïa kane ka kyrwoh naduh ki khun samla, ki longkmie ki longkpa khlem da jer kyrteng, namar ba ka 4 tarik kaba dei ka Foundation Day jong ka Ri-Bhoi ka hap haka sngi u Blei kumta haka jingïarai lang bad ki bor district la rai ban pynlong noh haka 5 tarik kaba dei ruh ka juh ka sngi ban rakhe ïaka World Environment Day” la ong u Bah Shadap.
U la ong ruh haba kynmaw ïa kane ngi pynkynmaw ruh sha ki khun ka Ri-Bhoi, ki Rangbah bad ki nongïalam da kaba ngim lah ban klet ïaki riew radbah kiba la wanrah ïaka Ri-Bhoi District kumne kumba ka long, kane ka kynthup naduh ka District Demand Committee bala khlieh da u Bah JD Rymbai (bam kwai ha dwar u Blei) kum u Chairman, Bah RR Makdoh kum u Secretary ha kato ka por kiba la trei tyngeh bad ngi ai nguh ïa u Blei ba dei haka jinglong Myntri Rangbah jong u Dr DD Lapang ngi ioh ïaka kabu haka 4 tarik Jylliew 1992 ngi la ioh ïaka District ba pura.
Naka liang ka Ri-Bhoi Dorbar ka ai ka jingkhublei ïa baroh kiba la don bynta ban pynioh ïaka District Ri-Bhoi khamtam ïa u Dr DD Lapang u ba haka jinglong Myntri Rangbah ngi la ioh ïaka kabu ban bsuh ïa kane ka jingmut jingpyrkhat ba ngin wanrah ïaka sorkar hajan jong u paidbah, ngin wanrah ïaka roi ka par kaba kham sted ha Ri-bhoi da kaba ngi ioh ïaka District, bad ngam artatien ba wat u Dr DD Lapang u la sngewhun ha kato ka por ba ka Ri-Bhoi kala ioh laka jong ka District ba pura.
Kumta naka liang ka Ri-Bhoi Dorbar ka khot bad wer ïa baroh ki paidbah nongshong shnong jong ka Ri-Bhoi ba kin mih ryntih ha katei ka sngi ban shim bynta haka jingrakhe ïaka jingdap 31 snem jong ka Ri-Bhoi District, ba ha katei ka sngi yn sa don ruh ka jingïatreilang bad ka bor district, ka tnad Forest shibynta ban rakhe ruh ïaka World Environment Day.
