Shillong, Ïaiong 02 : Ka sorkar jylla ka la shim lut ki lad ki lynti kumno ban ïakhun ïa ka jingduna ki doktor ha ka jylla bad wat ban pynbeit thymmai noh ïa ka ‘bond policy’.
Halor kane, ka Myntri ka tnad ka Koit ka Khiah, Dr. Ampareen Lyngdoh ka la ïathuh ha ki lad pathai khubor ba ka jingthungkam ba khatduh ïa ki kadei lyngba ka Recruitment Board kaba la thaw kyrpang khnang ban pynstet ïa ka jingduna ki doktor specialist ha kylleng ki bynta jong ka jylla.
“Ngi la pynkhreh mynta ban pynbna biang ïa kane mardor,” ong ka Myntri.
Ka Myntri ka la ïathuh ruh ba dang shen ka la pyntip ha Iing Dorbar ba ki don haduh 397 ngut ki Medical Officer ba thymmai kiba la thung lyngba ka Board ha kaba 83 ngut ki dei ki specialist doctor. Ka ong ruh ba ki dang don pat haduh 150 ngut ki specialist kiba dang duna ha ka jylla, kiba kum ka tnad ki sngewkhia bha.
Shuh shuh ka ïathuh ruh ba ka sorkar jylla ka la phah ruh ïa ki doktor na ka bynta ki jingshah pyntbit ha kaba ki doktor ha ki CHC, PHC ki la ïoh ïa ka jingtbit ban sumar ïa ki jingshitom kiba ïadei bad ki jingpang jong ki kynthei lane ki khunlung bad wat bad kiwei kiwei ruh.
Katkum ka jingïathuh jong ka, don ruh ki skmi jong ka sorkar India bad ar tylli ki hospital ha ka jylla, kata ka Civil Hospital Shillong bad ka Ganesh Das Hospital kiba ai mynta ïa kane ka jinghikai ïa ki doktor bad ki nongtrei ha ka koit ka khiah kiba la don ha ka kam la kumba katto katne snem bad ruh na bynta kito kiba lah ban leit sha kum kitei ki prokram.
“Da kaba pynlong ïa kine ki prokram, ngi lah ban pyndap kham kloi ïa ka jingduna ki doktor ha ki tnad ba kham donkam kum ha ka Gynecology, Paediatric, X-ray bad Pathology. Kane kadei ka rukom treikam kaba ngi shim bynta da ka jingkyrmen ba la kumno ngin lah ban pyntikna ba kine ki specialist kin ïoh ïa ka jingpyntbit la kumno kumno na bynta ka prokram ba 6 bnai ha shwa ba kin leit sha ki jaka sumr bapher bapher kaba donkam ïa ka jingshakri jong ki,” ka la ong.
Ha kajuh ka por pat ka Myntri ka la ïathuh ruh ba ka sorkar kan sa bishar bnïah ruh haba ïadei bad ka Bond Policy lane ka soskular ba ka sorkar ka ïasoi bad kito ki samla ha shwa ba kin leit pule doktor, hadien ba bun ki doktor kim treh ban trei ha ka jylla.
“Kiba bun na kine ki doktor ba pule naka bhah sorkar ki dang leit ha ki PG jong ki. La ka long ne kam long, ka sorkar kan kyntiew noh ïa ka jingphah siew ïa kine ki doktor kiba ym kwah ban trei lane shakri ha la ka jong ka jylla. Ïa kane ngin sa bishar bniah namar nga sngewthuh shai ba ïa kane ka kam la leh naduh lai ne saw snem mynshwa.”
La ïathuh ruh ba ha ka jingpynrung kam kaba dang shu dep, ka sorkar ka la thungkam kham bun na kitei ki doktor ba pule na bhah sorkar kiba la aplai na bynta ki kam kiba lait ha ka jylla.
