Yn pyntreikam noh ka NEHU ïa ka NEP 2020 ha ki kyrdan Under-graduate naduh u Nailar
Shillong, Naitung 19 : Ka North Eastern Hill University ha ka sngi Balang ka la pynbna ba kan pyntreikam noh ïa ka National Education Policy, 2020 na bynta ka Under Graduate naduh u bnai ban wan.
Dang shen, u Myntri ka tnad Pule Puthi ka sorkar jylla, Rakkam A Sangma u la pyntip ba don katto katne ki jaka pule ki bym kor bor ban pyntreikam ïa ka NEP, 2020 naduh mynta u snem. U la ïathuh ba ka tnad ka la dep ruh ban lum ïa ka jingïalang bad ki nongïalam jong ki jaka pule kynthup ïa ki Principal ha kaba ki la pynpaw ba kim lah ban pyntreikam ïa ka NEP naduh u 2023 hynrei kin pyrshang pat ban leh naduh ka samoi ban wan.
Haba pynbna ïa katei ka sienjam, u Vice Chancellor ka NEHU, u Prof. PS Shukla haba kren bad ki lad pathai khubor u la ïathuh ba ka skulbah ka la dep phah da ki shithi sha baroh ki jaka pule kiba la ïasoh ne hap ha ka jingkhmih jong ka NEHU ban pyntreikam noh ïa ka naduh ka 01 tarik Nailar 2023.
La pynshai ba lyngba ka NEP 2020, ka NEHU kan pyntreikam ïa ka Four-Year Undergraduate Programme (FYUP) bad kan pdiang ruh ïa ki jingpynrung thymmai ki samla pule da ka ba pdiang ïa ka Certificate jong ki Diploma bad ka Degree haba kut jong ka First, Second bad Third year.
U Prof Shukla u la ïathuh ba ka NEHU ka la dep ban pyntreikam ïa ka NEP 2020 na ka bynta ki kyrdan Post Graduate (PG) na bynta u snem 2022-2023 bad naduh 1 tarik Nailar 2023, ka NEHU kan pyntreikam ïa ka NEP 2020 na ka bynta ki kyrdan pule Under Graduate (UG).
Shuh shuh u Prof. Shukla haba jubab la ki don neem ki jaka pule ki bym pat kotbor ban pyntreikam ïa ka NEP, u la ong, “Haduh mynta ka skulbah kam pat ïoh ïa ka jubab haba ïadei bad ka shithi ba la phah ban pyntreikam ïa ka NEP bad ki don katto katne ki College kiba pynpaw ka jingeh ban pyntreikam ïa ka. Hynrei na ka liang ka NEHU ka la bthah ïa ki ban pyntip, balei kim lah ban pyntreikam khnang ba ka NEHU kan lah ban kner jingïarap sha kum kita ki College”.
Nalorkata, u la ïathuh ba ha ki sngi ban wan kino kino ki College ki bym kot bor ban pyntreikam kin pyntip khnang ba na ka liang ka skulbah kan ïaleh katba lah ban kner jingïarap ban pynthikna ba ka jingpyntreikam ïa ka NEP 2020 ha Meghalaya ka long kaba seisoh.