Yn pynlong Mock Drill ka DDMA halor jingkhynñiuh jumai

Shillong, Nailur 30: Katkum ka kyrwoh khubor ba la phah na ka liang ka DDMA kan pynlong ïa ka Mock Drill halor ka khynñiuh u Jumai ha ka Main bad Additonal Secretariat Building ha ka 4 tarik Risaw ha ka por 11 baje mynstep.
La ong ba ki nongtrei jong kitei ki artylli ki Secretariat kin ïashimynta lang ryngkat bad kiwei pat ki tnat sorkar kiba kynthup ïa ka SDRF/ Fire & Emergency Services, DM&HO, Police, MPRO, PWD, MeCEL, MUDA, Urban, PHED bad ki Volunteer.
Ha ka kyrwoh la ong ba nalor kane yn ïashimbynta lang da ka Civil Hospital bad Woodland Hospital ha katei ka Mock Drill.
Yn sdang ïa katei ka Drill da kaba pynsawa ïa ka siren ha ka por 11 baje mynstep ban pyni ba ka la don ka jingkhynñiuh u jumai ha ka por 11 baje mynstep, kumta ki nongtrei ha kitei ki ar tylli ki ophis sorkar kin mih na ki kamra treikam ki jong ki ban leit ïalum ha ka jaka kaba don ha All Saints Cathedral bad ha ka jaka kaba thylli kaba don hakhmat jong ka All Saint’s Hall.
La kyntu ïa ki paidbah ba kin ailad ïa ki Ambulance, kali pynlip ding bad ki kynhun leit ai jingïarap ba kin leh ïa la ka kamram ha katei ka sngi.