Shillong, Nailur 30: Ka Bharatiya Janata Party (BJP) ha ka sngi Nyngkong ka la pynpaw ïa ka jingdonkam ban pynthikna ba kan ym dei ban don ka jingpyndonkam bakla ïa ki central fund ne ka pisa ba la bei da ka sorkar pdeng.
“Ka jingsngewkhia kaba kongsan jong ngi ka long ba ym dei ban pyndonkam bakla ïa ka pisa. Ngi kwah ba kano kano ka fund kaba wan na ka sokar pdeng dei ban pyndonkam na ka bynta ka jingmyntoi jong ki paidbah,” ong u nongïalam ka BJP u Bah David Kharsati haba kren sha ki lad pathai khubor hadien ba shim bynta ha ka jingïalang ba la pynïaid da u chairman ka 16th Finance Commission bad ki seng saiñ pyrthei ha Meghalaya.
“Kumjuh ruh ngi pynpaw ka jingsngewkhia shaphang ka jingktah jong ka jingkylla ka suiñbneng ha Meghalaya,” u la ong da kaba pyntip ba la bthah ïa ka party ban pynkhreh bad aiti ïa ki jingai jingmut sha ka commission ha ka shi sngi ne arsngi.
